Minisitiri Jean Damascène, yabanje kwibutsa ko umuryango w’abibumbye wafashe ibyemezo binyuranye by’uko umutwe wa FDLR ari umutwe w’iterabwoba kandi ugomba gusenywa.

Yagize ati, “N’ubu amahanga arirengagiza impunzi z’abanyekongo zimaze imyaka 33 mu buhungiro zameneshejwe n’abarwanyi ba FDLR, bagizwe n’abakoze genocide mu Rwanda. Nyamara umuryango w’abibumbye wafashe ibyemezo byinshi byerekana ko FDLR ari umutwe w’iterabwoba ugomba guseswa. Nk’icyemezo 1804 cyafashwe mu mwaka wa 2008 kibivuga gutya. “Duhangayikishije n’uburambe bw’ibyaha bibangamira uburenganzira bwa Muntu, n’ibinyuranyije n’amategeko mpuzamahanga bikorwa na FDLR, Ex-FAR, interahamwe n’indi mitwe yitwaje intwaro ikomoka mu Rwanda ikorera mu burasirazuba bwa Repubulika ya Demokarasi ya Kongo. Dutegetse ko bashyira intwaro hasi aka kanya, nta mananiza ayo ari yo yose, bakajyanwa aho bakomoka. Turasaba ibihugu byose bigize umuryango w’abibumbye, gufata ingamba zose za ngombwa bigahagarika inkunga y’amafaranga, iy’ibikoresho, n’indi yose itangwa n’abenegihugu, cyangwa itangirwa ku butaka bwabyo, ihabwa FDLR, Ex-FAR, interahamwe n’indi mitwe yitwaje intwaro ikomoka mu Rwanda ikorera ku butaka bwa Repubulika ya Demokarasi ya Kongo, yaba yo ubwayo cyangwa mu nyungu zayo.””

Icyo cyemezo nyamara, cyaje gikurikira amasezerano yari yarasinywe hagati y’u Rwanda na Repubulika ya Demokarasi ya Kongo mu rwego rwo gusenya umutwe wa FDLR, ndetse n’icyemezo cyakanama k’umuryango w’abibumbye wasabaga imitwe yose yakoreraga mu mashyamba ya Repubulika ya Demokarasi ya Kongo kurammbika intwaro hasi.

Nubwo ibyo byemezo byafashwe ariko, minisitiri Jean Damascène, yagaragaje ko igihugu cya Repubulika ya Demokarasi ya Kongo cyabyirangagije nkana, kuko cyinjije umutwe wa FDLR mu ngabo zacyo, kandi umuryango w’abibumbye binyuze mu ngabo zawo zishinzwe kugarura amahoro muri Repubulika ya Demokarasi ya Kongo Monusco, ukaba ugikomeje kurebera, nk’uko byagenze ubwo uwo muryango binyuze mu ngabo zawo zari mu rwanda (Minuar) watereranye u Rwanda kandi hari ibimenyetso byagaragaraga ko genocide yari iri gutegurwa.

Minisitiri Jean Damascène kandi, yanagaragaje ubucuti buri hagati y’ubutegetsi bwa Repubulika ya Demokarasi ya Kongo ndetse n’umutwe wa FDLR ko bufitanye isano n’imvugo z’urwango ku batutsi zagiye zivugwa na bamwe mu bategetsi b’iki gihugu mu bihe bitandukanye, kuva mu mwaka wa 1998 kugeza ubu.

Muri Kanama 1998, Minisitiri w’ububanyi n’amahanga wa Kongo Abdoulaye Yerodia Ndombasi, yahamagariye kwica abatutsi abita udukoko twanduza tugomba gutsembwa nta we usigaye.”

Tariki 19 Nyakanga 2023, Depite Justin Bitakwira, yavugiye kuri Televiziyo ya Leta ngo, “Umututsi ni umwicanyi muri kamere ye.”

Tariki 31 Gicurasi 2024, umukuru w’umutwe wa Mai Mai Nande/Mazembe witwa Benoit Mukumbatia, yatangaje videwo ivuga ngo, “Umututsi nyawe, ni umututsi wishwe, umututsi nyawe ni ujyanwe mu irimbi.”

Tariki 4 Nyakanga 2024, minisitiri w’itangazamakuru Patrick Muyaya, kuri televiziyo 50 iri i Bukavu, yise abatutsi abicanyi avuga ngo, “Minisitiri w’intebe yabasuye! Yabasuye nk’umugore, umubyeyi, umuvandimwe, mu gice cy’igihugu mutuyemo, aho umugore yababajwe bikabije n’ubwicanyi ndengakamere bumaze imyaka 30 bukorwa n’abatutsi.”

Tariki 24 Ugushyingo 2024, Minisitiri w’ubucamanza Constant Mutamba ari i Goma, na we yasabye ko abatutsi bose bicwa bihereye ku bayobozi bakuru b’u Rwanda.

Uherutse kuvugwa vuba aha, ni umuvugizi w’ingabo za Repubulika ya Demokarasi ya Kongo Gen Maj Sylvain Ekenge, ubwo tariki 27 Ukuboza 2025, yavugiye kuri televiziyo y’igihugu amagambo y’ivangura agira ati, "Uyu munsi iyo ushakanye n'umugore w'umututsi ugomba kwitonda cyane, ugomba kwitonda kuko…baguha n'umuntu wo mu muryango we nka mwishywa we, mubyara we

uza iwawe kandi atari mubyara cyangwa mwishywa we ahubwo ari umuntu uje kubyarana n'umugore wawe iwawe, [yabyara] bakakubwira ngo hoya abana bavutse ari

[basa] abatutsi kuko abatutsi ari ubwoko bwo hejuru, kandi ari ubugambanyi, ubwenge."

Minisitiri Jean Damascène kandi, yanagarutse ku kubogama kwa zimwe mu ntumwa z’umuryango w’abibumbye zoherezwa muri Repubulika ya Demokarasi ya Kongo agira ati, “Muri Gashyantare 1999, Roberto Garreton wabaye intumwa idasanzwe ya Komisiyo ya Loni y’Uburenganzira bwa Muntu muri Congo, yatanze ikiganiro gihamagarira urwango ku Batutsi avuga ngo hariho ukwinangira k’Umuryango w’Abibumbye, guturuka ku rugomo rukorerwa Congo ruturutse ku gatsiko k’Abatutsi.”

Minisitiri Jean Damascène kandi, yagejeje ku mukuru w’igihugu ubutumwa bw’abanyarwanda bamushimira ko nubwo umutwe wa FDLR ukomeje guhabwa intebe muri repubulika ya Demokarasi ya Kongo, u Rwanda ruzakomeza gukomera no kutagushwa na FDLR binyuze mu ngamba z’ubwirinzi u Rwanda rwafashe.

Yagize ati, “Abanyarwanda babashimira umutekano mwabahaye n’ingamba mufata zibarinda. Abo mwarokoye mu mwaka wa 1994, basubiranye icyizere cy’ubuzima barimo kandi

abenshi barokotse Jenoside za kera kuva mu 1959 kugeza mu 1994.

Urubyiruko rubashimira amahirwe mwaruhaye, yo kuba mu gihugu kitavangura. Abakoze Jenoside benshi bararangiza ibihano; barabashimira ingamba zo kubagorora

bagasubizwa ubuntu biyambuye, bagataha mu ngo zabo.”

Minisitiri Jean Damascène, mu izina ry’abitandukanyije n’imitwe yitwaje intwaro ikorera mu mahanga, yashimiye umukuru w’igihugu agira ati, “Hari benshi baba mu mahanga bitandukanya n’ikinyoma gikwizwa n’abakoze Jenoside cyangwa ababaye imbata y’ingengabitekerezo yayo, bagataha

mu rwababyaye rukabakira bakaba babashimira imiyoborere myiza y’u Rwanda ibasubiza ishema ry’Igihugu cyabo.”

Minisitiri Jean Damascène, yasoje ikiganiro cye yizeza umukuru w’igihugu ko nta wuzasenya ubumwe, ubudaheranwa ndetse n’iterambere igihugu kigezeho abanyarwanda babirebera agira ati, “Harabaye ntihakabe, Habaye Muyaga na Muhoro, ubu hariho Mahoro na Munyarwanda,

ni bo bazahoraho.”

Perezida Kagame yavuze ko hari impungenge z’uko inama zimwe na zimwe zigenda zisubiramo ibibazo n’ibisubizo ariko bigakomeza kugaruka mu buryo bumwe, bigaragaza ko hari aho imikorere idindira.

Ati: “Ariko ngira ngo nsabe, inama nk’izi n’ibiganiro byanyuze muri izo nama ntibikabe ibyo guhora dusubiramo bimwe tutabona ikibivamo, bikaba umugenzo gusa, tukajya tuza tukavuga ibibazo, tugatanga ibisubizo ariko umwaka washira twagaruka tugasanga ni nka kwa kundi.”

Umukuru w’Igihugu yavuze ko bidakwiye ko abantu bafite ubushobozi, ubumenyi n’ibikoresho bikenerwa badindira mu mikorere yabo, ibintu asobanura nk’imwe mu mbogamizi z’ingenzi ziterwa n’imico.

Ati: “Abantu iyo badindira mu mikorere no ku bintu bazi, urebye ni ibibazo bya rusange dufite, navuga ko ari no muri Afurika. Igisobanuro cy’uko Igihugu cyacu n’ibindi byinshi muri Afurika bidatera imbere, ahanini bishingiye ahangaha.”

Perezida Kagame yashimangiye ko ibitekerezo byiza bidahita bihinduka imikorere myiza igihe bidaherekejwe n’ingiro.

Ati: “Ibitekerezo byiza ntabwo bivamo imikorere myiza buri gihe, ntabwo bijyana iteka. Hari abantu benshi bafite ubushobozi, ariko hari ikintu kiza kikabavanamo ubwo bushobozi, umuntu akabura aho bugiye.”

Yavuze ko politiki ari umuco, bityo ubumenyi n’ubushobozi abantu bafite bikwiye kugaragarira mu byo bakora buri munsi, aho kwibanda ku magambo gusa.

Umukuru w’Igihugu yanagarutse ku bibazo by’imitekerereze bikibangamiye iterambere rya Afurika, avuga ko nubwo hari imbogamizi zituruka hanze y’umugabane, Abanyafurika bagomba kwibanda ku kwigobotora no kwigira.

Ati: “Umugabane wacu wa Afurika, indwara iwurimo ni iyihe? Hari ubwo twifashisha ko abaduteye ibibazo na kera kose bakidukurikirana, ariko ukwiye kumenya ko ugomba gukora ibishoboka byose ngo wivane muri iyo ngoyi.”

Perezida Kagame yagereranyije Afurika n’umuntu uba arwariye mu bitaro igihe kirekire, aho rimwe na rimwe agobokwa ariko ntakire burundu, agaragaza ko hakenewe impinduka zishingiye ku bushake n’imbaraga z’imbere.

Yanibukije Abanyarwanda ko bagomba kwamagana serivisi mbi ndetse n’abantu babacunga nabi, avuga ko kwemera guhabwa serivisi mbi na byo ari ikibazo kigomba guhinduka.

Ati: “Uwakurindagije wibwira ko ari we kibazo? Ikibazo ni wowe wemera kurindagira. Twahindura gute imico yacu, ingendo yacu, ingiro yacu, byose ko tubizi, hagati yacu? Hari ibibazo byinshi ku Isi, ibyo ntabwo tubifitiye ubushobozi bwo kubikemura ariko dufite ubushobozi bwo gukemura ibyacu.”

Perezida Kagame kandi yasabye Abanyarwanda gushyira imbaraga mu byo bakora, bagashaka uko babana neza n’abandi ku rwego mpuzamahanga, ariko bagaharanira kwigira no kwishingikiriza ku mbaraga zabo.

Ati: “Dukore ibishobotse, ibishobotse byose bikwiriye gukorwa, hanyuma dushake uko tubana n’abandi, ari abaturanyi ari abatuye kure, nibidukundira dukorane neza, nibyanga izo mbaraga tuzigarure iwacu dukore, niko twatera imbere gusa. Ibi rero ntabwo bikwiye kuba amagambo, ibivugirwa hano bikwiriye kuvamo ibikorwa bigaragara ko dutera imbere.”

Inama y’Igihugu y’Umushyikirano ya 20 yasize ishimangiye ko imiyoborere ishingiye ku bikorwa, inshingano no kwigira ari imwe mu nkingi zikomeye zizafasha u Rwanda gukomeza urugendo rw’iterambere rirambye.

Perezida wa Repubulika Paul Kagame ageza ijambo ku bitabiriye Inama y’Igihugu y’Umushyikirano ya 20

Abayobozi bakuru bitabiriye inama y'Igihugu y'Umushyikirano

Abanyarwanda bibukijwe ko bagomba kwamagana serivisi mbi no gushyira imbere inshingano

Minisitiri Nduhungirehe yavuze ko mu mwaka wa 2003 u Rwanda rwari rufite Ambasade 20 mu bihugu by’amahanga, ariko kuri ubu zimaze kugera kuri 50, zikwirakwira mu migabane yose y’Isi.

Ati “Ndetse na Ambasade z’amahanga zariyongereye kuko mu gihe cy’Umushyikirano wa mbere twari dufite Ambasade 16 gusa, ariko ubu zimaze kuba 47.”

Yongeyeho ko u Rwanda rumaze kuba igicumbi cy’imiryango mpuzamahanga itandukanye, aho imiryango 22 ifite icyicaro mu Rwanda, ibintu bigaragaza icyizere mpuzamahanga igihugu gifitiwe.

U Rwanda kandi rubarizwa mu miryango mpuzamahanga ikomeye irimo Umuryango w’Ibihugu bikoresha Ururimi rw’Igifaransa (Francophonie) n’Umuryango wa Commonwealth, ndetse rukagira uruhare rugaragara mu bikorwa byo kubaka Afurika Yunze Ubumwe.

Minisitiri Nduhungirehe yavuze ko mu Rwanda hamaze kubera inama mpuzamahanga nyinshi z’ingenzi, anibutsa ko Perezida wa Repubulika Paul Kagame yigeze gushyirwaho kuyobora Akanama ka Afurika Yunze Ubumwe gashinzwe kuyivugurura.

Ati “Ibyo byose byerekana ko u Rwanda rubanye neza n’amahanga kandi tuzakomeza kuwushimangira no kuwuteza imbere.”

Yagarutse kandi ku ruhare rw’Abanyarwanda batuye mu mahanga (Diaspora), avuga ko bakomeje gukangurirwa kwishyira hamwe, gukunda igihugu no kuruhagararira neza aho bari hose.

Minisitiri Nduhungirehe yerekanye ko uruhare rwa Diaspora mu bukungu bw’igihugu rwiyongereye ku buryo bugaragara, binyuze mu mafaranga bohereza mu Rwanda.

Ati “Mu gihe cy’Umushyikirano wa mbere, amafaranga Abanyarwanda baba mu mahanga boherezaga mu gihugu yari miliyoni 9,6 z’amadorali y’Amerika, ariko ubu ageze kuri miliyoni 502 z’amadorali. Ni ukuvuga ko byikubye hafi inshuro 52.”

Yongeyeho ko Abanyarwanda baba mu mahanga bakomeje gushora imari mu Rwanda, ndetse bakagira uruhare mu bikorwa by’iterambere birimo Chana Challenge, Dusangire Lunch n’ibindi.

Byongeye kandi, Diaspora igira uruhare mu kohereza Abanyarwanda bize kandi bafite ubunararibonye mu mahanga, bagataha gufasha igihugu mu nzego zitandukanye zirimo ubuzima, imyuga, uburezi n’izindi.

Minisitiri Nduhungirehe yasobanuye ko Diaspora ifite uruhare rukomeye mu guteza imbere ubukungu bw’igihugu, ashimangira ko Guverinoma izakomeza gushyiraho uburyo bworohereza Abanyarwanda baba mu mahanga kugira ngo bakomeze kugira uruhare rufatika mu iterambere ry’u Rwanda.

Abitabiriye Inama y’Igihugu y’Umushyikirano bateraniye muri Kigali Convention Centre baganira ku mibereho n’iterambere ry’u Rwanda mu cyerekezo cy’ahazaza.

Mu rwego rw’ubuhinzi, Minisitiri Dr. Ndabamenye yagaragaje ko u Rwanda rufite amahirwe adakwiye gupfushwa ubusa nubwo hakiri imbogamizi z’ubuso buhingwa.

Yagize ati: “50% by’ubuso duhinga burasharira ariko ndabyemeranya n’abo mu turere twa Nyaruguru na Nyamagabe. Baravugaga bati ‘Nta butaka busharira hasharira ingoma mbi’. Ubu uko babivuga bamaze guhindura imyumvire, ubu dufite noneho ubuyobozi, nta ngoma dufite. Nkibwira rero ko ayo mahirwe twayakoresha kugira ngo dushyire ishoramari rifatika mu nyongeramusaruro, cyane ishwagara.” Yongeyeho ko “nta terambere ry’ubuhinzi n’ubworozi ridafite umusaruro uhagije”, asaba ko iterambere ryibanda ku kongera umusaruro aho kwishingikiriza gusa ku kwagura ubuso.

Naho rwego rw’ubukungu rusange, Minisitiri w’Imari n’Igenamigambi, Yusuf Murangwa, yagarutse ku kibazo cy’izamuka ry’ibiciro by’ibiribwa, agaragaza ishingiro ryacyo.

Yagize ati: “Ku kibazo cy’ibiciro by’ibiribwa bizamuka, ikibitera cyane ni umusaruro w’ubuhinzi udahagije. Nta kindi gisubizo, tugomba kuzamura umusaruro.”

Ku bijyanye n’umutungo kamere, Umuyobozi Mukuru wa RMB, Alice Uwase, asubiza ku kibazo yari abajijwe na Perezida wa Repubulika Paul Kagame cy’uko hari amabuye y’agaciro u Rwanda rukura muri Repubulika iharanira Demokarasi ya Kongo, nk’imwe mu mpamvu igaragazwa n’abahora bikoma u Rwanda barushinja ko rwaba ruteza umutekano mucye mu burasirazuba bwa Kongo, yavuze ko u Rwanda rwihagije ku mabuye y’agaciro.

Ati: “Ntabwo dukeneye amabuye ya Congo ngo dutere imbere, imisozi yacu irimo amabuye, icyo dusabwa cyonyine ni ukumva agaciro kayo tukagira icyerekezo kirambye, tukamenya ko tutazajya twohereza amabuye atanoze ahubwo tugomba kuyatunganya.” Uyu murongo uhuza n’icyerekezo cyo kongerera agaciro umusaruro w’imbere mu gihugu, bityo bikabyara imirimo n’inyungu zirambye.

Kuri iyi ngingo Perezida wa Repubulika, Paul Kagame, yamaze impungenge abanyarwanda ndetse n’uwakwifuza wese gukora ubucuruzi bw’amabuye y’agaciro aho aba aturuka hose mu gihe yaba abukoze mu buryo butanyuranije n’amategeko.

Ati: “Amabuye y’agaciro turamutse tuyatunganya aho yava hose ntabwo bikwiye kuba ikibazo, kubera ko nujya ukurikirana abantu bose bari mu bucuruzi bw’amabuye y’agaciro cyane cyane ibi bihugu biteye imbere, byirirwa bidukurikirana ku mabuye y’agaciro, nta mabuye y’agaciro bagira ariko bayungukamo kurusha abantu bose”

Yongeyeho ati: “Ibice bya Congo byose ntabwo duturanye na byo. Duturanye n’u Burasirazuba bwa Congo. Ibiva Katanga, Equateur ntabwo binyura hano. Bifite indi mipaka binyuramo cyangwa bikagenda mu ndege ariko hano mu burasirazuba usibye n’amabuye n’abantu barambuka bagafata indege bakajya iyo bajya.”

Imibare y’ubukungu yagaragajwe muri iyi nama ishimangira ko iyo nzira iri gutanga umusaruro kuko mu bihembwe bitatu bya mbere bya 2025, urwego rw’ubuhinzi rwazamutse ku mpuzandengo ya 7% ruvuye kuri 5% muri 2024, urw’inganda ruzamuka ku kigero cya 10% naho urwego rwa serivisi rukazamuka ku mpuzandengo ya 9%.

Mu 2024, izamuka ry’ubukungu ryageze kuri 8,9% rivuye kuri 8,2% ryariho muri 2023, rirenze 8,3% byari biteganyijwe. Ni mu gihe mu bihembwe bitatu bya 2025, ubukungu bwakomeje kuzamuka ku mpuzandengo ya 8,7%, aho bwari kuri 6,5% mu gihembwe cya mbere, 7,8% mu gihembwe cya kabiri na 11,8% mu gihembwe cya gatatu.

Dr. Télesphore Ndabamenye, Minisitiri w’Ubuhinzi n’Ubworozi

"Nta kindi gisubizo, tugomba kuzamura umusaruro.”  Yusuf Murangwa, Minisitiri w’Imari n’Igenamigambi

“Ntabwo dukeneye amabuye ya Congo ngo dutere imbere" -  Alice Uwase, Umuyobozi Mukuru wa RMB

Umukuru w’Igihugu yavuze ko Umushyikirano ari urubuga rwihariye rufasha Abanyarwanda kurebera hamwe aho Igihugu kiva n’aho cyerekeza, hashingiwe ku ntego yo guteza imbere imibereho y’abaturage no kubaka ejo hazaza heza.

Ati: “Iyi nama ifite icyo imariye Igihugu kandi ibaye kenshi, buri uko ibaye ibyaganiriwemo n’ibyemezo byafashwe bigenda bigira uburyo bifasha Igihugu gutera intambwe ndende iganisha ku bindi bikorwa.”

Perezida Kagame yavuze ko imibare igaragaza ko u Rwanda rwateye intambwe ishimishije, by’umwihariko mu kugabanya ubukene no kongera umubare w’abashobora kwigira no kwiteza imbere.

Ati: “Imibare iragenda yerekana ko twagiye dutera intambwe, hari imibare y’abavuye mu bukene, bageze aho bashobora kwigira bagakomeza inzira yo gutera imbere.”

Yongeye gushimangira ko ishingiro ry’iterambere ry’u Rwanda rishingiye ku kwigira, aho Abanyarwanda biyemeje kubaka ejo hazaza habo badategereje inkunga y’abandi.

Ati: “Ibyo byose bijya gutangira, urwo rugendo rwashingiraga ku gushaka kwigira nk’abantu, nk’Igihugu, ku buryo tutabaho bitewe n’amahirwe twagize kubera ko ari uwatugiriye imbabazi agashaka kudufasha yaba yabuze bikatugiraho ingaruka zitari nziza. Kwigira rero, ni yo ntego, ni wo mugambi, ni yo nshingano twese dufite.”

Ku bijyanye n’imiyoborere, Perezida Kagame yavuze ko umuco wo kubazwa inshingano uzakomeza kwimakazwa, kuko ari wo musingi w’iterambere rirambye.

Ati: “Ibi ndabivugira ko hari ibintu byinshi twashoboye gukemura ndetse n’umuco twahinduye, bituma dutera intambwe ndende mu gukemura ibibazo nk’Abanyarwanda.”

Yashimangiye ko abayobozi batubahiriza inshingano zabo babibazwa, kandi ko ibyo u Rwanda rumaze kugeraho bidakwiye gutuma habaho kwirara.

Ati: “Ariko Igihugu nk’icyacu, u Rwanda, ibibazo ndetse n’amahirwe twaba dufite byose hamwe, mu miterere yacu, ntabwo twakumva bihagije ngo twateye intambwe. Dushaka kongera gutera indi ntambwe ndende kurusha iya mbere. Ni bwo buryo twabaho nk’Igihugu cyacu. Nta bundi buryo.”

Perezida Kagame kandi yavuze ko imiterere y’u Rwanda isaba gukora cyane, rimwe na rimwe bikagera aho hari abayobozi n’abaturage barara badasinziriye, batekereza icyateza imbere Igihugu.

Ati: “Niba ari abantu bashaka kwiha agaciro, kwigeza aho bagomba kuba bagera, gukoresha uburyo bifitemo, icyo gihe bifite icyo bidusaba kindi, ndetse byasaba na bamwe kudasinzira, ariko kurushaho unatekereza icyatuma utera intambwe mu nzira y’amajyambere cyangwa se nk’abayobozi, uko uyitera niko uyigezaho n’abandi cyane cyane abo tuyobora.”

Inama y’Igihugu y’Umushyikirano, iteganywa n’ingingo ya 141 y’Itegeko Nshinga rya Repubulika y’u Rwanda, ni urubuga ruhuza Perezida wa Repubulika n’abahagarariye abaturage, igaterana nibura rimwe mu mwaka igamije gusuzuma uko ubuzima bw’Igihugu n’ubumwe bw’Abanyarwanda bihagaze. Perezida ni we utumiza kandi akayobora iyi nama, akanagena n’abayitabira, mu rwego rwo kurebera hamwe ibibazo by’ingenzi by’Igihugu n’ibyifuzo by’abaturage.  

Iyi Inama y’Igihugu y’Umushyikirano yatangiye uyu munsi ibaye ku nshuro ya 20, ni mu gihe Inama ya mbere nk’iyi yateranye ku wa 28 Kamena 2003 ibera mu nteko ishinga amategeko. Biteganijwe ko iyi nama izasoza imirimo yayo ku wa gatanu taliki ya 6 Gashyantare 2026.

Abahagarariye inzego zitandukanye z’Igihugu bitabiriye Umushyikirano, baganira ku miyoborere, iterambere n’imibereho y’Abanyarwanda.

Umushyikirano ukomeje gufatwa nk’urubuga rukomeye ruhuza ubuyobozi n’abaturage mu gushakira hamwe ibisubizo by’ibibazo by’Igihugu.

Abayobozi mu nzego zitandukanye z’igihugu bitabiriye Umushyikirano

Ati: “Iyo wababaye by’ukuri, ntushobora gutekereza kurenganya undi,” yavuze.

Prof. Nsengimana yagarutse ku bihe bya mbere bya Guverinoma y’Ubumwe, avuga ko n’abari abaminisitiri batangiye bakorera mu buzima bugoye, bahembwa ahubwo bahabwaga ibyo kurya

Ati: “Twatangiye duhabwa iposho (Ibyo kurya) nk’abandi bose, harimo Pate jaune, ibishyimbo, amata y’ifu n’ibindi, mbese ibintu inkotanyi zashoboye gukusanya ndetse no kugenda byari biruhije nubwo byagiye bihinduka buhoro buhoro ariko twabanje kugenda ku maguru”

Yavuze ko nyuma gato baje noneho guhabwa n’umushahara w’amafaranga. Ati: “Twamaze amezi 3 dutangira guhembwa amafaranga 18,000 nyuma yaho bigera kuri 80,000 ariko icyiza muri byose nuko ntawigeze abyinubira”

Yasobanuye ko icyo gihe cyaranzwe no kwitanga no gushyira imbere igihugu kurusha inyungu bwite, ari na byo byafashije mu kongera kubaka inzego za Leta no gusubiza icyizere Abanyarwanda.

Amb. Prof. Nsengimana yavuze ko Perezida Paul Kagame ayobora u Rwanda mu buryo buhuza igitsure n’ubumuntu, aho gufata ibyemezo bikomeye bijyana no kumva abaturage no gutanga amahirwe yo kwikosora.

Ati: “Perezida Kagame ni umugabo udasanzwe. Afite igitsure, ariko icy’ibanze ni ukumva. Arababarira, ariko ntiyihanganira amakosa asubirwamo,”

Yongeraho ko iyo myumvire y’imiyoborere ari yo yatumye u Rwanda rushobora kugarura ituze, kubaka inzego zikomeye no gutangira urugendo rw’iterambere.

Mu kiganiro cye, Prof. Nsengimana yashimangiye ko indangagaciro zirimo inshingano, ukwicisha bugufi n’ubutabera ari zo zagize uruhare runini mu kubaka igihugu nyuma ya Jenoside.

Asaba urubyiruko n’abayobozi b’ejo hazaza gufata amateka y’u Rwanda nk’isomo, bakagira umutima wo gukunda igihugu bakaba bakinambira mugihe ibintu Bihari Atari byinshi bakemera gufata bicye ariko bakemera kugikorera

Yavuze ko asanga ari imigisha myinshi kuba yarakuze akorera igihugu uyu munsi akaba abona abakiri bato bafata inshingano zo kugikorera bagera ikirenge mu cyabo.

Ati: “Ukwibyara gutera ababyeyi ineza, ni imigisha, burya ugomba kurera umwana ukamutoza kuba umugabo ndetse no kuba umunyakamaro, iyo aguhiriye ukabona yarayobotse inyigisho wamuhaye biba ibyishimo uretse kuri wowe, ahubwo ku Rwanda rwose”

Amb. Prof. Joseph Nsengimana afite imyaka 65 y’amavuko, kuri ubu afite umuryango w’abana 4 n’abuzukuru 3. Mu bihe 3 yagiye agira imyanya y’ubuyobozi itandukanye mu gihugu, aho yabaye Minisitiri wa mbere w’amashuri makuru n’ubushakashatsi muri Guverinoma ya mbere, yayoboye Minisiteri y’abakozi ba Leta, Minisiteri y’ubutaka n’ibidukikije, aba Umujyanama wihariye wa Perezida wa Repubulika y’u Rwanda kandi yanabaye Ambasaderi mu muryango w’abibumbye n’iyindi itandukanye.

Ibi bikaba bigaragaza uruhare rwe rukomeye rukomeye mu kubaka Igihugu no guharanira itarambere ryarwo mu ruhando rw’amahanga nyuma y’ibihe bikomeye rwanyuzemo.  

Nyamara nubwo manda yari iteganyirijwe imyaka itanu, mu turere tumwe na tumwe haje kugaragara impinduka mu buyobozi, bituma bamwe mu bayobozi batabasha gusoza manda batorewe. Iyi nkuru isesengura uko ibi byagenze, igaragaza uturere twagize impinduka, abatararangije manda n’ababasimbuye, ndetse ikanasesengura icyo ibi bisobanura mu miyoborere y’inzego z’ibanze.

Mu Ntara y’Amajyepfo, Uwatorewe kuyobora Akarere ka Nyaruguru Emmanuel Murwanashyaka, Nyamagabe iyoborwa Niwemwungeri Ildebrande, mu gihe Gisagara yayobowe na Jérôme Rutaburingoga. Dr Sylvere Nahayo yatorewe kuyobora Akarere ka Kamonyi, Muhanga iyoborwa na Kayitare Jacqueline, naho Nyanza iyoborwa na Erasme Ntazinda mu gihe Ruhango yari ifite Habarurema Valens nk’Umuyobozi w’Akarere, naho Huye ikomeza kuyoborwa na Ange Sebutege, umwe mu bayobozi wari wongeye kugirirwa icyizere n’Inama Njyanama.

Mu Ntara y’Iburasirazuba, Akarere ka Bugesera kayobowe na Mutabazi Richard, Kayonza iyoborwa na Nyemazi John Bosco, naho Gatsibo iyoborwa na Gasana Richard. Niyonagira Nathalie yatorewe kuyobora akarere ka Ngoma, mu gihe Nyagatare yayobowe na Gasana Stephen, naho Kirehe iyoborwa na Bruno Rangira, Rwamagana iyoborwa ba Mbonyumuvunyi Radjab

Mu Ntara y’Uburengerazuba, Akarere ka Nyamasheke Appolonie Mukamasabo niwe watsindiye ku kayobora, Karongi iyoborwa na Mukarutesi Vestine, naho Rutsiro ikayoborwa na Murekatete Triphose. Ngororero yayobowe na Nkusi Christophe, Kambogo Ildephonse atorerwa kuyobora akarere ka Rubavu mu gihe Nyabihu yayobowe Mukandayisenga Antoinette. Mu gihe Dr Kibiriga Anicet yatorewe kuyobora akarere ka Rusizi, uyu akaba yaranagaragaraga mu cyiciro cy’abayobozi bafite ubunararibonye mu nzego zitandukanye za Leta n’imiyoborere y’ibanze.

Mu Ntara y’Amajyaruguru, amatora y’abayobozi b’inzego z’ibanze yasize Gicumbi iyobowe na Nzabonimpa Emmanuel, Burera iyoborwa na Uwanyirigira Marie Chantal, naho Musanze iyoborwa na Ramuli Janvier. Akarere ka Gakenke icyo gihe kayobowe na Nizeyimana Jean Marie Vianney, mu gihe Rulindo yayobowe na Judith Mukanyirigira. Aba bayobozi bari bitezwemo gukomeza guteza imbere iyi ntara, yari izwiho kuba igicumbi cy’ubukerarugendo n’ubuhinzi bukoresha ikoranabuhanga.

Aba bayobozi b’uturere bose batoranywaga binyuze mu Nama Njyanama z’Uturere, bagirirwa icyizere cyo kuyobora abaturage mu bikorwa bigamije kunoza imiyoborere myiza, kwimakaza iterambere rirambye no gushyira mu bikorwa gahunda za Leta z’igihe kirekire. Manda yabo yateganywaga kuzana impinduka zigaragara mu nzego z’imibereho, ubukungu n’iterambere ry’uturere bayoboraga.

Nubwo iyi manda yari iteganyirijwe imyaka itanu, mu turere tumwe na tumwe habaye impinduka mu buyobozi, bituma bamwe mu bayobozi batabasha kuyirangiza. Mu Ntara y’Amajyepfo habonetse akarere kamwe kagize impinduka mu buyobozi, mu Ntara y’Iburasirazuba haboneka uturere tubiri, mu Ntara y’Iburengerazuba haboneka uturere dutanu twagize impinduka, mu gihe mu Ntara y’Amajyaruguru habonetse uturere dutatu twasimbuwemo abayobozi batorewe manda ya 2021–2026.

Mu Ntara y’Amajyepfo, impinduka zabaye mu Karere ka Nyanza, aho Akarere kayoborwaga na Erasme Ntazinda, ariko nyuma hashyirwaho Kajyambere Patrick nk’Umuyobozi w’agateganyo, akomeza inshingano zo kuyobora Akarere mu gihe gisigaye.

Mu Ntara y’Iburasirazuba, impinduka zabaye mu turere tubiri. Mu Karere ka Kayonza, Nyemazi John Bosco wari Mayor watowe muri 2021 yasimbuwe by’agateganyo na Hategekimana Fred. Mu Karere ka Nyagatare, Gasana Stephen na we yasimbuwe na Kakooza Henry nk’Umuyobozi w’agateganyo, akomeza kuyobora Akarere mu gihe gisigaye cya manda.

Mu Ntara y’Uburengerazuba ni ho habonetse impinduka nyinshi, aho uturere dutanu twagize abayobozi bashya basimbuye abatowe mu 2021. Mu Karere ka Nyamasheke, Appolonie Mukamasabo yasimbuwe na Mupenzi Narcisse. Karongi yayoborwaga na Mukarutesi Vestine, nyuma asimburwa na Gerard Muzungu. Rutsiro, yari iyobowe na Murekatete Triphose, asimburwa na Kayitesi Dative, naho Rubavu yari iyobowe na Kambogo Ildephonse, nyuma asimburwa na Mulindwa Prosper. Mu Karere ka Rusizi, Dr Kibiriga Anicet yasimbuwe na Sindayiheba Phanuel, akomeza inshingano zo kuyobora ako karere.

Naho mu Ntara y’Amajyaruguru, impinduka zabaye mu turere dutatu. Mu Karere ka Burera, Uwanyirigira Marie Chantal yasimbuwe na Mukamana Soline. Mu Karere ka Musanze, Ramuli Janvier asimburwa na Nsengimana Claudien, naho mu Karere ka Gakenke, Nizeyimana Jean Marie Vianney yasimbuwe na Mukandayisenga Vestine, akomeza kuyobora Akarere mu gihe cyasigaye cya manda.

mu turere 27 tugize u Rwanda hatabariwemo uturere tugize Umujyi wa Kigali, hagiye habamo impinduka mu bayobozi b’uturere 11, bivuze ko hafi 40.7% by’abayobozi batorewe manda ya 2021–2026 batabashije kuyirangiza, maze basimburwa n’abayobozi b’agateganyo cyangwa bashya hashingiwe ku byemezo by’Inama Njyanama z’uturere.

Kugeza ubu, ku rwego rw’intara, imibare igaragaza ishusho itandukanye hashingiwe ku mubare w’uturere tugize buri ntara aho
mu Ntara y’Amajyepfo ifite uturere 8, habonetse akarere kamwe gusa kabayemo impinduka, zingana na 12.5% by’abayobozi b’iyi ntara batasoje manda.

Mu Ntara y’Iburasirazuba igizwe n’uturere 7, habaye impinduka mu turere tubiri, bingana na 28.6% by’abayobozi batabashije kurangiza manda, naho mu ntara y’Uburengerazuba ifite uturere 7, ni ho habonetse impinduka nyinshi, aho uturere 5 twagize abayobozi basimbuwe, bingana na 71.4%, bigaragaza ko iyi ntara ariyo yagize ihindagurika kurusha izindi ntara.

Mu Ntara y’Amajyaruguru igizwe n’uturere 5, habonetse impinduka mu turere dutatu, bingana na 60% by’abayobozi batabashije kurangiza manda batorewe muri 2021.

Iyi mibare igaragaza ko nubwo manda y’inzego z’ibanze yari iteganyijwe kumara imyaka itanu, ubuyobozi bwagiye buhinduka mu turere tumwe na tumwe, ariko imiyoborere yakomeje kubungabungwa binyuze mu gusimbuza abayobozi mu buryo bwemewe n’amategeko, hagamijwe kurinda icyuho mu miyoborere no gukomeza kugeza serivisi ku baturage no gukurikiza intego z’iterambere z’igihugu.

Izi mpinduka zigaragaza ko nubwo abayobozi batorewe manda y’imyaka itanu, imiyoborere y’inzego z’ibanze ikomeza kubungabungwa mu gihe habaye impamvu zituma umuyobozi adakomeza inshingano ze. Inama Njyanama z’uturere zakomeje kugira uruhare mu gusimbuza abayobozi batakiri mu mirimo, hagashyirwaho abayobozi b’agateganyo cyangwa bashya kugira ngo serivisi zigenewe abaturage zitazamo icyuho, kandi ibikorwa by’iterambere bikomeze mu murongo Leta yihaye.

Yavukiye mu buhunzi, ariko umuco ntiwigeze umuvamo. Asobanura ko ababyeyi bamutoje indangagaciro z’iwabo ari zo zamugumishije ku muzi.

Ati:“Navukiye mu buhunzi ariko ababyeyi batugaburiye umuco wacu, ni cyo kintu cyadufashije.” Ise Sentore, ni we watangije ibikorwa by’Itorero mu buhunzi, akanabyigisha abato. Aho ni ho Masamba akura izina n’umurage w’inganzo, nubwo amazina yo mu muryango ahamya isano n’amateka ya Afurika mukuru we yitwa MRC izina Papa we yamwise kubera urukundo yakundaga Patrice Emery Rumumba kubera ibikorwa bye yaharaniraga byo gushaka ubwigenge bwa Repubulika Iharanira demokarasi ya Kongo no kurwanya akarengane n’ivangura, naho Massamba akomora izina rye ku munyepolitiki witwaga Massamba, burya anagira izina Butera abantu benshi batazi, izina akomora k’uwamutoje witwaga Butera.

Ku ruhande rw’amateka y’urugamba, Massamba agaruka ku mwaka w’1989 ubwo yajyaga muri Uganda mu bikorwa byo gukusanya inkunga yagombaga gufasha RPF Inkotanyi agahura n’abayobozi bakamuganiriza. Ati: “Nahuye na Rwigema anyigisha umuryango, na Perezida Kagame twaraganiriye; banyigishije byinshi.” Ibi biganiro byose n’ibindi byose yasanze byatumye ahita agira ishyaka ryo kwinjira muri RPF Inkotanyi.

Muri icyo gihe, inganzo yabaye intwaro yo kongera morale ku rugamba. Ati: “Twahimbaga indirimbo zongerera imbaraga abasirikare; byabafashaga kudacika intege,”.

Avuga ku ndirimbo zahanzwe, yavuze ku ndirimbo nk’Intsinzi ko itari ishingiye ku ntsinzi yamaze kuboneka kuko yahimbwe intsinzi itaraboneka, ahubwo yari ishingiye ku cyizere

Ati: “Ni iby’umuhanzi abonera kure akumva ko bishoboka.” Anibuka uko indirimbo Ab’i Wacu Muraho yatumye abantu benshi binjira mu nkotanyi ndetse baranazikunda, ndetse n’uruhare rukomeye rwa Radio Muhabura mu bukangurambaga bwo gukangurira abanyarwanda kwiyunga na RPF Inkotanyi, nubwo yakurikiranwaga mu bwihisho.

Ku bijyanye n’imiyoborere, Massamba agaragaza icyubahiro afitiye Perezida Kagame, avuga ko ijambo rye rimubera isomo. Ati: “Hari igihe muvuga nkumva simuvuga uko nshaka kumuvuga kuko ni umugabo w’icyitegererezo. Kugeza ubu ijambo ryose avuze nifuza kuryumva nubwo yaba yarivuze ntahari nshaka uko ndibona nkaryumva kuko rinsigira amasomo menshi.”

Ahamya ko amahirwe yo kugira umuyobozi nka Perezida Kagame aboneka gake: Ati: “Umuyobozi nka Perezida Kagame aboneka rimwe mu myaka 200, Niyo mpamvu dukwiye kumufata neza tukamusigasira.”

Massamba ashimangira ko umuco wagize uruhare rukomeye mu kubohora igihugu no kugihuza. Ati: “Umuco uri mu byatumye igihugu kibohorwa kuko icyatumye tubona u Rwanda nuko twabaye abanyarwanda, dukunda iwacu, dukunda umuco wacu, tujya mu ndangagaciro turazisesengura turazimenya ari nacyo cyatumye twemera gufata umuheto no gutanga ubuto bwacu kugirango tubone icyo gihugu”

Ni yo mpamvu akomera ku njyana ya gakondo: ati: “Iyi njyana nkora ihishemo ubunyarwanda; ni yo mpamvu nyikomeraho.” Yongeraho ko buri wese yagize uruhare mu kubaka igihugu akoresheje impano ye ari nayo mpamvu nawe yakoresheje iye. Ati:“Nanjye nakoresheje inganzo yanjye.”

Mu buzima bwe bwite, avuga ko icyamunejeje kurusha ibindi ari ugutaha u Rwanda yabwirwaga na basogokuru, no kugira igihugu;

Ati:“Icyanshimishije cyane ni ukubona u Rwanda ba Data na ba Sogokuru banganirije nkabona ndugezemokandi nkaba nticuza ubuto bwanjye n’ubwamamare bwanjye natanze kugirango nkibone, nkaba ntakitwa impunzi kuko ubu ndatembera nagera mu mahanga bakanyakira na yombi, mbese kugira igihugu biranezeza.”

Ku rubyiruko ruri mu myidagaduro, Massamba atanga impanuro ishingiye ku mateka igihugu cyanyuzemo n’uko bakwiye kwitwara uyu munsi; gukunda igihugu, kubaha umuco, no gukoresha impano bagamije icyiza rusange. Inkuru ye igaragaza ko inganzo itari imyidagaduro gusa ahubwo ari imbaraga zubaka, zihuza, kandi zigatanga icyizere.

TWAMENYE INTWARO MASSAMBA YARI AFITE KU RUGAMBA

Ati: “Njyewe navukiye Kamwezi, amateka yacu ntabwo nyazi neza ariko uko tubyumva, Sogokuru ubyara Data yimutse avuye Remera-Rukoma mu Karere ka Kamonyi naho Sogokuru ubyana Mama yaturutse I Rukara mu karere Ka Kayonza hafi y’I Gahini”

Ku cyatumye yiga amategeko, yavuze ko yakuze akunda kwiga indimi cyane cyane icyongereza ariko kubera ubwinshi bw’ibitabo yasomye byigisha uburyo bwo kurenganura abantu byatumye ahindura ibyo kuzaba umunyamakuru ahubwo arahindura yifuza kuzaba umunyamategeko urenganura abarenganye.

Ati: “Mu mashuri yisumbuye nize NTARE School, nakundaga ibigendanye n’indimi nari nziko nziga icyongereza nkagikomeza ariko natangiye gusoma ibitabo nabonaga mu isomero ngasoma ibitabo bivuga ku iperereza, kubera ko intwari zabaga muri ibyo bitabo zafashaga abantu barenganye, nkabona ibintu byo kunganira abantu barenganye ari ibintu byiza, ndavuga nti noneho mu mwanya wo kuzaba umunyamakuru noneho ngiye kwiga amategeko nanjye nzajye mfasha abantu barenganye batsinde imanza zabo”

Uretse inshingano ze z’ubunyamategeko, Prof. Rugege agaragaza ko ari Umwangirikani, usenga kandi akaririmba. Nubwo yakoraga mu mirimo ya Leta, avuga ko atigeze areka ukwemera kwe.

Ati: “Nanjye ndi Umwangirikani, gufata Bibiliya n’igitabo cy’indirimbo nkajya gusenga ndabizi, nanijoro ndasenga ubundi nkaririmba. Nkiri no mumirimo ya leta najyaga gusenga ku cyumweru nasengeraga kuri Saint Etienne mu biryogo”

Mu rugendo rwe rw’umwuga, Prof. Sam Rugege yibuka kurahiza Perezida wa Repubulika Paul Kagame nk’igihe cyamuhaye ishema n’uburemere bw’inshingano yakoraga.

Ati: “Kurahiza Perezida wa Repubulik twese dukunda byampesheje ishema, Nakoraga Inshingano zanjye nka Perezida w’Urukiko rw’Ikirenga ariko nanjye ku giti cyanjye byaranshimishije”

Prof. Sam Rugege avuga ko yavuye mu gihugu cya Uganda mu mwaka wa 1976 aho yahise yerekeza muri Afrika y’amajyepfo ahoy amaze imyaka 28 yigisha muri Kaminuza zitandukanye zo mu bihugu nka Lesotho na Afrika y’epfo kuko yabisoje mu mwaka wa 2004.

Mu mwaka wa 2002, Prof. Rugege yagize uruhare mu gutegura inyandiko y’itegeko nshinga rishya afatanije na komisiyo yari yashyizweho yo kubikurikirana

Prof. Sam Rugege avuga ko yatangiye kujya mu mirimo ya Leta mu mwaka wa 2004. Ati: “Natangiye kujya mu mirimo ya Leta mu mwaka wa 2004, barampamagaye aho nigishaga bambaza niba nshobora kuza nanjye ngatanga umusanzu wanjye mu gihugu cyacu ndavuga nti ntabwo nabitekerezagaho ariko reka mbitekerezeho nzababwire ariko ndabishaka nyuma barampamagara nkora ikizamini cya kuvuga (Interview) muri Sena hanyuma ntangira nka Visi Perezida mu rukiko rw’ikirenga”

Yamaze imyaka 8 muri uyu mwanya, nyuma yahoo aza kuzamurwa mu ntera aba Perezida w’urukiko rw’ikirenga nyamara Atari abyiteze ahubwo yiteguraga kwisubirira mu bwarimu.

Ati: “Naje kugira amahirwe yo kuzamurwa mu ntera mba Perezida w’urukiko rw’ikirenga, ni ibintu ntatekerezaga ntari niteze ahubwo njya kurangiza manda niteguraga gusubira mu bwarimu ariko baza kumbwira ko bakinkeneye nanjye ndabyemera”

Atanga inama ku bakiri bato yo kumenya igihugu cyabo no gushishikazwa no kugiteza imbere.

Ati: “Icyo nabwira cyane cyane abakiri bato, bakwiye kumenya Igihugu cyabo no kuba basobanura uko ibintu bimeze kandi bagashishikazwa no gukomeza kugifasha no gukomeza kugiteza imbere kugirango abanyarwanda bakomeze kubaho neza”

Prof. Sam Rugege yavutse mu mwaka 1947, kuri ubu afite imyaka 78. Akomoka kuri se Canon Mutware William Iyakaremye Rugege witabye Imana afite imyaka 98 mu mwaka w’2013. Afite abana 2 b’abakobwa umwe akaba ari Umuyobozi wa Gashora Girls Academy School undi kaba yarize amategeko muri Arika y’efo akaba ari naho afite akazi.

Kuri ubu Prof. Sam Rugege ari mu kiruhuko cy’izabukuru yatangiye mu mwaka w’2022. Avuga ko nubwo ari mu kiruhuko cy’izabukuru ariko atabura utundi turimo yakora turimo gutanga ibiganiro no gukora ubuhuza.

(7) Kurahiza Perezida #Kagame||Imyaka 16 mu buyobozi bw’urukiko rw’ikirenga||Prof.Sam Rugege - YouTube

Abo basenateri barimo Senateri Prof. Dusingizemungu Jean Pierre, Senateri Uwizeyimana Evode, Senateri Dr. Uwamariya Valentine, Senateri Gasana Alfred, Senateri Dr Frank Habineza na Senateri Nkubana Alphonse.

Mu ijambo rye ubwo yari amaze kwakira indahiro z’abasenateri, Perezida Kagame yavuze ko Sena igira uruhare rukomeye mu miyoborere y’Igihugu kandi ituma inzego zibona aho zishyira imbaraga.

Ati: “Ndashimira Abasenateri bashya bahawe izi nshingano. Inteko Ishinga Amategeko cyane cyane Sena, igira uruhare rukomeye mu miyoborere y’Igihugu cyacu. Sena ituma inzego z’Igihugu zibona aho zishyira imbaraga kandi igakora isuzuma rikenewe kugira ngo inzego zose zigume ku murongo.”

Perezida Kagame yasabye Abasenateri barahiye gushyira mu bikorwa ibiba byemejwe, ndetse bakagenzura ko n’izindi nzego zibigenza uko.

Ati: "Politiki yacu kenshi iba igaragara neza mu nyandiko, mu mpapuro; ikintu cy'ibanze cya ngombwa ni uko ibyo byiza byanditse bishyirwa mu bikorwa ntibihere mu mpapuro gusa, ntibihere mu nyandiko"

Perezida Kagame yasabye Abasenateri barahiye gushyira mu bikorwa ibiba byemejwe

Senateri Prof. Dusingizemungu Jean Pierre na Uwizeyimana Evode, bari basanzwe muri Sena, aho basoje manda ya mbere bakongera kugirirwa icyizere n’Umukuru w’Igihugu. Ni mu gihe Dr. Uwamariya Valentine na Gasana Alfred bo bagiye bakora inshingano zitandukanye zirimo kuba bamwe mu bagize guverinoma

Dr Frank Habineza uyobora Ishyaka Riharanira Demukarasi no Kurengera Ibidukikije, agiye muri Sena nyuma y’uko muri 2024 yari yarangije manda ye mu mutwe w’Abadepite naho Nkubana Alphonse, we ari umuyobozi w’Ishyaka ry’Ubwisungane bugamije Iterambere (PSP).

Mu basenateri 8 bashyirwaho na Perezida wa Repubulika, harimo 4 bashyizweho umwaka ushize barimo Dr Kalinda Francois Xavier kuri ubu akaba ariwe uyobora Sena, harimo kandi Bibiane Mbaye Gahamanyi, Dr Usta Kayitesi na Soline Nyirahabimana hari kandi n’abandi 4 bari bashyizweho mu mwaka wa 2020 barimo Senateri Evode Uwizeyimana, Senateri Kanziza Epiphanie, Senateri Jean Pierre Dusingizemungu na Senateri Twahirwa Andre.

Kuri ubu, Sena y’u Rwanda igizwe n’abasenateri 26 barimo abagabo 13 bangana na 50% n’abagore 13 banga na 50%.

Muri aba harimo Honorable Valentine Uwamariya na Honorable Alfred Gasana binjiye muri Sena bwa mbere hamwe na ba Honorable Evode Uwizeyimana na Jean Pierre Dusingizemungu bari barangije manda imwe muri Sena bakaba barongeye kugirirwa icyizere n’umukuru w’igihugu. Harimo kandi Honorable Frank Habineza uyobora Ishyaka Democratic Green Party of Rwanda na Nkubana Alphonse uyobora PSP baherutse gutorwa n’ihuriro nyunguranabitekerezo ry’imitwe ya Politiki yemewe mu Rwanda, mbere yo kwemezwa n’urukiko rw’ikirenga.

Sena y’ u Rwanda yagiyeho muri 2003, kuva icyo gihe hakaba hamaze kubaho manda 4 zirimo 2 z’imyaka 8 n’ebyiri z’imyaka itanu.

Manda igezweho ubu, ni manda ya Kabiri ya sena kuva Itegeko nshinga ryavugururwa muri 2015, manda y’abasanateri ikava kuri manda imwe y’imyaka 8 ikajya kuri manda y’imyaka 5 ishobora kongerwa inshuri imwe.

Iyi manda y’abasenateri nirangira hari 14 bazaba barangije manda bemererwa n’itegeko nshinga n’abandi 12 bemerewe kuba babona indi manda y’imyaka5.

Muri rusange Sena igizwe n’abasenateri 26 barimo 12 batorwa hashingiwe ku nzego z’imitegerekere y’igihugu, 8 bashyirwaho n’umukuru w’igihugu, 4 batororwa n’imitwe ya politiki na 2 baturuka mu mashuri makuru ya Leta n’ay’igenga.

Perezida wa Repubulika ashyiraho abasenateri 8 barimo 4 batangirana na manda n’abandi 4 bashyirwaho manda imaze umwaka umwe.

Ihuriro nyunguranabiteketerezo ry’imitwe ya Politiki ritora abasenateri 4 barimo 2 batangirana na manda naho abandi babiri bakajyaho nyuma y’umwaka umwe manda itangiye.

Madamu Jeannette Kagame yavuze ko Kwibuka abazize Jenoside yakorewe Abatutsi mu 1994, ari ugusubiza icyubahiro abishwe bazira uko bavutse, no kubabwira ko u Rwanda rwongeye kubaho.

Yagize ati “Mube abarinzi b’amateka b’ukuri, ubumwe n'ubudaheranwa byacu. Uku niko kwibuka iteka urungano rwanyu rwishwe muri Jenoside tuzirikana uyu munsi.Rubyiruko, Bana Bacu, muramenye ntimuzatatire igihango cy'urungano!”

Yakomeje asaba urubyiruko gushishoza "Mu bishishikaza urubyiruko buri munsi, ntimukaburemo imbaraga z'umutima n'ubwenge bwo gushishoza, guhitamo neza, ibyo mwemera n'abo mukurikira, kuko guhitamo ibitari byo bingana no kwanga kubaho kuri mwe ubwanyu no ku bazabakomokaho."

Madamu Jeannette Kagame yasabye urubyiruko kwima amatwi abaharabika u Rwanda n’abagoreka amateka yarwo.

Yagize ati "Ubu, hari abantu bigize impuguke ku Rwanda ku buryo buri wese abyuka yumva afite icyo aruvugaho, byitwa ko agamije ineza y'Umunyarwanda; aka wa mugani ngo 'Urusha nyina w'umwana imbabazi...' Muri ibyo byinshi mwumva, umuhanga ni uzabasha gushishoza no gusesengura, akamenya ibyo yumva n'ibyo akurikira."

Madamu Jeannette Kagame yasabye urubyiruko gushungura ibyo babona ku mbuga nkoranyambaga ndetse rukagendera kure ingengabitekerezo ya Jenoside.

Ati “Mukomereze aho ndetse munarusheho kuko ingengabitekerezo ya Jenoside ni virusi mbi, mukwiriye kujya mubona hakiri kare maze mukayirinda, mukayikumira, mukayanga mukanayirwanya.

Ihuriro Igihango cy’urungano ryateguwe na Minisiteri y’Ubumwe bw’Abanyarwanda n’Inshingano mboneragihugu ku bufataye n’umuryango Imbuto Foundation.