Musabyimana Jean Baptiste washinze akaba anayobora iki kigo ni umunyarwanda waminuje amasomo y’ubukungu mu Bufaransa. Asobanura urugendo rwe agira ati:

“Nagiye mu bufaransa muri 2003 ngiye kwiga, ndangije kwiga nkorerayo, hanyuma igihe kiza kugera mbona ko ari ngombwa ko nanjye nkwiye kugaruka ngo ntange umusanzu wanjye mu kubaka igihugu. Nize ibijyanye n’ubukungu ndetse n’amasoko y’imigabane ndetse n’ibijyanye n’amategeko y’ubucuruzi, nagarutse muri 2016.”

Yahisemo gushora imari mu bworozi bw’inkoko abitewe n’akamaro yabonaga zifite mu mirire y’abaturage n’isoko ryabyo.

Ati “Nahisemo korora inkoko kuko nasanze aricyo kiribwa cy’ingirakamaro mu birinda indwara abanyarwanda bageraho mu buryo bworoshye kandi kitabahenze, gusa natekerezaga ko nimara kubona mbasha kubahaza ku magi nyuma nzorora inkoko z’inyama. Niyo mpamvu nashinze iki kigo cya ABUSOL LTD”

Ku bijyanye n’intego ze z’igihe kirekire, agaragaza ko adashaka inyungu z’ubucuruzi gusa, ahubwo ko ashaka impinduka mu mibereho y’abaturage n’urubyiruko. Ati:

“Inzozi zanjye ni uko abanyarwanda bose babanza bakemera ko amafunguro yabo ya buri munsi yaba ariho igi, ikindi nuko urubyiruko rwabanza rukabonamo akazi ari benshi”

Ku bufatanye na AGRA, Musabyimana avuga ko byabaye amahirwe akomeye ku kigo cye no ku rubyiruko rwo mu Ntara y’Iburasirazuba.

Ati“Twishimiye kujya mu mushinga wa YEFFA kuko wari uhuje n’intego zacu, icyo gihe baduhaye kwigisha abantu bo mu ntara y’iburasirazuba tukigisha urubyiruko no kwihangira akazi”

Mu myaka 2 Abusol  imaze guhugura urubyiruko rurenga 10,00 binyuze mushinga YEFFA wa AGRA ku nkunga ya Mastercard Foundation.Bahugurwa  mu micungire y’imishinga y’ubw’ubworozi bw’inkoko, kubona amasoko, gukumira no kurwanya indwara, n’ibindi bitandukanye.

Bamwe mu rubyiruko  bavuga ko bungutse ubumenyi bubafasha kuva ku bworozi bwa gakondo bajya ku bworozi bwa kinyamwuga.

Jean Chrysostome Dukuzumuremyi wo mu karere ka Bugesera agira ati: “Aya mahugurwa ya YEFFA arafasha cyane kuko uko twororaga izi nkoko mu cyaro iwacu, twakoraga by’amaburakindi, ubu rero twasanze uburyo bwiza bwo korora ari ukororera ahantu ku buryo uzirinda ibyonnyi zikororerwa mu nzu, ikindi nuko ushobora korora inkoko nyinshi ariko ugakoresha ubutaka butoya cyane kandi zikarya ibiryo bicyeya zikanatanga umusaruro mwinshi, ibi rero nkatwe urubyiruko bizadufasha kuko ushobora gutangirira ku gishoro gitoya zikagenda zikungura ku buryo mu gihe gito wagira inkoko nyinshi”

Naho Nyiransengimana Josephine wo mu karere ka Nyagatare, agaragaza ko yungutse ubumenyi bwimbitse ndetse n’icyizere cyo kwiteza imbere. Ati: “Ikintu umushinga YEFFA umfashije, umpaye amahugurwa n’ubusobanuro bwimbitse kubijyanye n’ubworozi bw’inkoko, uburyo zororwa kandi menye gutandukanya ubwoko bw’inkoko ndetse menye ko inkoko zitanga umusaruro vuba kandi zikororerwa ku butaka butoya, ibyo bigatuma umuntu uzoroye abasha kwiteza imbere ndetse akanateza imbere igihugu”

Avuga kandi ko umushinga wabahaye imbaraga zo kwigira no kwitinyuka. Ati: “Twebwe nk’urubyiruko, uyu mushinga wadufashije kwitinyuka tugakora n’imbaraga zacu tudateze amaboko bigatuma tubasha kwiteza imbere ubwacu”

Muri aba 2100 bigiye mu kigo cy’amahugurwa cya Abusol aho buri cyiciro mu kiba gitahiwe gihabwa inyigisho z’iminsi icumi irimo iyo bigira mu cyuma cyabugenewe n’indi bigira ku biraro by’inkoko bareba uko bikorwa nyirizina mu gihe 900 bo bajyanwa aho inkoko zororerwa kugira ngo barebe uko bikorwa mu buryo bwa kijyambere dore ko n’ubundi baba basanzwe bazorora.Ikigo Abusol kandi cyasanze urubyiruko rugera ku 4000 aho rusanzwe rukorerwa ubworozi kikabarekera uko bikorwa naho abagera ku 3000 cyabasanze mu midugudu hagamijwe kubashishikariza ibyiza byo kuyoboka ubuhinzi n’ubworozi.

Zimwe mu nkoko zirenga 130,000 zororerwa ku buso bwa hegitari 14 na Abusol LTD, zitanga amagi agera ku 80,000 ku munsi.

Urubyiruko ruri mu mahugurwa atangwa na AGRA binyuze mu mushinga YEFFA

Umushinga YEFFA uterwa inkunga na Mastercard Foundation ufasha urubyiruko rurenga 10,000 kwinjira mu bworozi bw’inkoko no kwihangira imirimo ibafasha kwiteza imbere.

Ati: “Abantu benshi batinya gushora mu buhinzi, bakabifata nk’aho ari ukwishyira mu kaga. Njye mbona ari ukwikunda, kandi ukikunda nta cyo uba ufite. Ushoye mu buhinzi uba ushoye neza, kuko ni ho hari amahirwe yo gukora ibintu byinshi byiza binakugirira akamaro.”

Urugendo rwe mu buhinzi rwatangiriye mu kazi yakoreye Leta y’u Rwanda guhera mu 1997, aho yagize amahirwe yo gukorana n’imiryango itandukanye ikorera mu rwego rw’ubuhinzi, bikamutera kurushaho kubukunda. Muri 2007, yinjiye muri Minisiteri y’Ubuhinzi n’Ubworozi, anashinzwe ishami ryo kuvugurura ubuhinzi.

Avuga ko gukorera Leta byamuhaye ubumenyi n’ubunararibonye byamubereye umusingi w’ibyo akora uyu munsi.

Ati: “Nta cyiza nko gukorera Leta, iragukoresha, ikakwigisha, ikaguhuza n’abantu, ikongeraho no kuguhemba. Iyo uvuye muri Leta uba ufite byinshi byo gukoresha mu kwikorera.”

Muri 2014, Nsengiyumva yahisemo gusiga akazi ka Leta ajya kwikorera, atangira gukorana n’abahinzi no gukora ubushakashatsi ku bigori. Ibyo byatumye ahitamo kwibanda ku mbuto z’ibigori, abonamo amahirwe yo kuzana igisubizo ku kibazo cy’umusaruro muke wagaragaraga mu gihugu.

Ati: “Abantu bakwiye kureka kwibeshya ko umuntu agomba gukora icyo yize gusa. Ahubwo akora ikimurimo, akareba aho hari icyuho n’aho ashobora gutanga umusanzu.”

Mu rugendo rwe, Nsengiyumva yagiye gupiganira imbuto z’ibigori zigezweho mu muryango mpuzamahanga CIMMYT, ikigo cy’ubushakashatsi ku rwego rw’isi kibanda ku bigori n’ingano. Aho bahabwa imbuto nshya, ariko bagasabwa kuzikuba bakazibyaza izindi, ku buryo mu myaka itarenze itanu baba bashoboye kugaburira n’abandi bahinzi.

Ni muri urwo rugendo yahise atangiza imbuto yise MUHABURA, anahura na AGRA, umuryango nyafurika uharanira iterambere ry’ubuhinzi.

Ati: “AGRA yaduhaye inkunga y’amafaranga yadufashije gukora igerageza ritandukanye ku mbuto, gukodesha uturima two guhingamo no gukorana n’abahinzi ba mbere hirya no hino mu gihugu.”

Nyuma y’imyaka itatu y’igerageza mu turere dutandukanye, imbuto ya MUHABURA yashyikirijwe Leta muri 2019 ngo yandikwe, iza kwemerwa mu 2022. Nsengiyumva avuga ko ari bwo bwoko bwa mbere bw’imbuto z’ibigori bwasohotse mu Igazeti ya Leta mu Rwanda.

Imbuto ya MUHABURA itanga umusaruro uri hagati ya toni 10 na 12 kuri hegitare, mu gihe ahandi henshi mu gihugu hasanzwe hasarurwa hagati ya toni 5 na 6, naho impuzandengo y’igihugu ikaba hafi toni 2 kuri hegitare.

Ati: “Ibi byerekana ko dushobora kuzamura umusaruro wacu cyane, iyo dufite imbuto nziza kandi zigera ku bahinzi ku gihe.”

Ubufatanye na AGRA bwabafashije kongera ubumenyi mu kwamamaza imbuto, mu kuyigeza ku bahinzi no gushyiraho uturima tw’icyitegererezo abahinzi bareberaho. Gusa, avuga ko urugendo rutari rworoshye, kuko yagiye acibwa intege kenshi n’abantu batemeraga ibitekerezo bye.

Ati: “Hari benshi bamfashije, ariko hari n’abandi benshi bagerageje kunca intege. Iyo AGRA itadufasha, byari kugorana cyane.”

Nsengiyumva asaba Leta kongera imbaraga mu bufatanye n’abikorera mu butubuzi bw’imbuto, ikabakurikirana, ikanabategurira amahugurwa akorerwa mu mirima. Anasaba ko bahabwa uburenganzira bwo gukoresha ububiko bw’igihugu bw’imbuto, kugira ngo bashobore kubika utunyangingo tw’imbuto z’ingenzi, bityo birinde kuzitakaza igihe habaye ikibazo.

Kuri ubu, imbuto ya MUHABURA ikorwa na KILIMO BUSINESS LTD iri ku isoko ry’u Rwanda kandi ikunzwe n’abahinzi. Iyo sosiyete imaze no gukora andi moko atatu y’imbuto z’ibigori zemewe ku rwego rw’igihugu no ku rwego mpuzamahanga. Ikorera ku buso burenga hegitare 220, ikabasha gutubura toni zirenga 1000 z’imbuto ku mwaka.

Urugendo rwa Nsengiyumva François rugaragaza ko ishoramari mu buhinzi rishoboka, rikunguka, kandi rikagira uruhare runini mu guhindura imibereho y’abaturage n’ubukungu bw’igihugu.

Mu murima umwe, ubona urugendo rwose rw’ubuhinzi

Iyo ubuhinzi bukozwe kinyamwuga, umusaruro urivugira 

Yavuze ko ikawa yoherejwe mu mahanga yari toni 846, yinjiza amadolari ya Amerika 5 149 902 mu gihe icyayi cyoherejwe ni toni 647 zinjije amadolari y’Amerika 1 849 650.

NAEB yavuze ko kandi kandi ingano zoherejwe mu mahanga zanganaga na toni 413 zinjirije amadolari y’Amerika 350 657.

Ni ibihingwa byoherejwe mu bihugu bitandukanye birimo ibyo mu mu Karere ka Afurika y’Iburasirazuba, u Bufaransa, u Bwongereza, Leta Zunze Ubumwe z’Abarabu (UAE), u Budage n’u Buholandi.

NAEB kandi yavuze ko imbuto na zo zoherejwe mu mahanga muri icyo gihe zanganaga na toni 492, zikaba zarinjirije u Rwanda amadolarari ya Amerika 600 024.

Zoherejwe mu bihugu byo mu Karere, Leta zunze ubumwe za Amerika, Leta Zunze Ubumwe z’Abarabu na Vietnam.

Indabo zo zoherejwe hanze y’u Rwanda mu bihugu by’u Bwongereza n’u Buholandi, zikaba zingana na toni 16 zirwinjiriza amadolari ya Amerika 91 134.

NAEB kandi yavuze ko ibihingwa bitandukanye ibinyampeke, ibinyamisogwe, ibinyabijumba n’ibindi, hoherejwe toni 5,541 zinjije asaga 3 226 706, bikaba byaroherejwe mu bihugu byo mu Karere, Leta Zunze Ubumwe za Amerika na Oman.

Ibikomoka ku matungo

Ikigo cy’Igihugu gishinzwe guteza imbere ibyoherezwa mu mahanga bikomoka ku buhinzi n’ubworozi cyavuze ko u Rwanda rwohereje ibikomoka ku matungo bingana na toni 158 zinjije amadolari ya Amerika 233 803, bikaba byaroherejwe mu bihugu byo mu Karere no ku Mugabane wa Afurika.

Abahuguwe binyuze muri iyi gahunda barimo abayobozi muri za minisiteri zishinzwe ubuhinzi, abakora mu bijyanye n’ubuhinzi, sosiyete sivile n’ibigo bishinzwe iterambere mu bihugu umunani byo muri Afurika y’Iburasirazuba, Iburengerazuba n’iyo Hagati.

Mu mezi 16 bamaze bahugurwa, bize ibijyanye no gucunga imishinga y’ubuhinzi, ubufatanye mu kugera ku ntego zo kwihaza mu biribwa n’ibindi.

Lilian Githinji, Umuyobozi ushinzwe kubakira ubushobozi ibigo muri AGRA akaba anashinzwe CALA by’umwihairiko, yavuze ko aya mahugurwa yibanze cyane ku rubyiruko kuko ari rwo hazaza h’ubuhinzi bwa Afurika.

Ati “Ibisubizo byinshi biri kuboneka mu rwego rw’ubuhinzi uyu munsi, biri kuva mu rubyiruko rwa Afurika. Inshingano zacu ni ugukorana n’abafatanyabikorwa mu guherekeza no korohereza urubyiruko kugira ngo rukomeze gushyira mu bikorwa iyo mishinga myiza.”

Iki kigo cya CALA cyashinzwe na AGRA [Ikigo Nyafurika ku Iterambere ry'Ubuhinzi] ku bufatanye n’Ikigo gitanga ubumenyi bugamije guteza imbere ubucuruzi cya ‘African Management Institute (AMI).

Intego yari ukugira ngo kijye gifasha abayobozi bari mu nzego zitandukanye by’umwihariko urw’ubuhinzi no kwihaza mu biribwa. Ni abayobozi baba bahagarariye inzego zitandukanye za leta, abikorera ndetse na Sosiyete Sivile.

Ubwo hatangwaga impamyabushobozi, CALA yatangaje ko igiye kwagurira ibikorwa byayo mu bihugu bikoresha Ururimi rw’Igifaransa birimo Togo, Sénégal, Mali na Burkina Faso. Ni gahunda iteganyijwe mu ntangiro za 2026.

Menya byinshi kuri CALA

Ibi biganiro byabereye, i Kigali hagamijwe kurebera hamwe uburyo bwo kurwanya imirire mibi muri ibi byiciro.

Minisiteri y’Ubuhinzi n’Ubworozi (MINAGRI), yerekanye ko mu ruhererekane rw’ibiribwa hakiri imbogamizi zituma ibiribwa bifite intungamubiri bitaboneka ku buryo buhagije, bihenze cyangwa bitaboneka kuri bose.

Ibi bituma imirire mibi ikomeza kuba ikibazo cyane mu bana bari munsi y’imyaka itanu n’abagore batwite hamwe n’abonsa.

Mbere yo kugirwa Umunyamabanga wa Leta muri Minagri, Dr Ndabamenye yari Umuyobozi Mukuru w’ikigo cy’igihugu gishinzwe guteza imbere ubuhinzi n’ubworozi, RAB, kuva tariki ya 2 Werurwe 2023.

Dr. Ndabamenye yabaye umujyanama mukuru muri MINAGRI, anakora indi mirimo itandukanye muri RAB irimo kuyobora ishami rishinzwe umusaruro w’ibikomoka ku buhinzi no kwihaza mu biribwa.

Yabaye Perezida w’inama y’ubuyobozi y’ikigo cy’igihugu gishinzwe kurengera ibidukikije (REMA), aba na Perezida w’Inama Njyanama y’Akarere ka Nyamasheke.

Afite impamyabumenyi y’ikirenga n’iy’icyiciro gatatu cya kaminuza mu bijyanye n’ubumenyi bw’ubutaka.

Nubwo ibi bigaragaza impinduka nziza, abahinzi bavuga ko kuba nta bwishingizi bafite bituma bahora mu gihirahiro igihe ibihe bitagenda neza.

Niyonsenga Jean Damascène, umuhinzi w’ikawa mu karere ka Kamonyi, avuga ko nubwo umusaruro wiyongereye kubera imbuto n’ifumbire byiza, ikibazo cy’ubwishingizi gikomeje kubahungabanya.

Ati: “Iyo imvura nyinshi iguye cyangwa izuba rikabije rikangiza ikawa, nta muntu ubaza uko tumeze. Abahinzi b’ibigori cyangwa umuceri bo bashobora kubona ubwishingizi, ariko twebwe abahinzi b’ikawa turacyategereje. Ikawa irahenda kuyitaho, iyo iguhombeye ntawe ubaza uko uzabyifatamo.”

Uwimana Vestine, umuhinzi wo mu karere ka Ruhango, avuga ko hari igihe imyaka yangirika kubera indwara cyangwa amapfa, bigatuma bahomba cyane.

Ati: “Twabaye nk’abarwanira mu kizima. Tubonye ubwishingizi byadufasha kuko twajya duhinga tuzi ko tutazahomba burundu. Ariko kugeza ubu turabyimenyera byose kandi biragoye cyane.”

Ibi kandi bishimangirwa na Baragahorana Oreste, Umuyobozi w’Ishyirahamwe ry’abatunganya umusaruro wa kawa no muwohereza mu mahanga, wavuze ko abahinzi abahinzi ba kawa bakorana neza n’amabanki ariko bakaba bayashishikariza kubizera.

Ati: “Abahinzi b’ikawa ni bamwe mu bakorana neza n’amabanki, kandi nta gihombo gikabije cyigeze kigaragara mu mishinga yabo. Twasaba amabanki n’ibigo by’ubwishingizi ko byongera icyizere n’imikoranire n’abagize uru rwego, kuko ibikorwa by’ubuhinzi bw’ikawa bigaragaza umutekano n’ubushobozi bwo kwishyura. Niba twifuza iterambere rirambye, tugomba kugira uburyo bw’imari n’ubwishingizi buhamye bujyana n’ibihe”

Umuyobozi Mukuru wa NAEB, Bizimana Claude, aganira n'itangazamakuru yavuze ko ikibazo cy’ubwishingizi ku ikawa cyamaze gushyirwa ku meza y’ibiganiro n’inzego zibishinzwe, kandi hari icyizere ko bizatanga umusaruro mu gihe cya vuba.

Ati: “Ubwishingizi Leta yarabuzanye kugira ngo bufashe mu guhangana n’ihindagurika ry’ikirere. Hari ibihingwa byafashwe mbere kandi bigenda byiyongera uko umwaka uje undi ugataha. Ubu natwe turimo kureba uko ibihingwa byoherezwa mu mahanga, birimo n’ikawa, byajya mu bwishingizi kuko nayo ifite ingaruka nyinshi.”

Yakomeje agira ati: “Tugiye gutangira ibiganiro n’abafite ibigo bitanga ubwishingizi, tubagaragarize imibare dufite itanga icyizere. Intego ni uko n’iyo inkunganire iva kuri Leta yaba itabonetse, umuhinzi ubishoboye yabasha kwifatira ubwishingizi mu buryo bworoheje.”

Bizimana avuga ko icyizere gihari kuko hari ibigo by’ubwishingizi byatangiye kugaragaza ubushake bwo gukorana na NAEB mu gushyiraho ubwishingizi bwihariye ku ikawa, bukajyana n’uburyo bwo gusuzuma ingaruka z’imihindagurikire y’ibihe ku buhinzi.

U Rwanda rukomeje gushora imari mu kongera ubuso buhingwaho ikawa no gusimbuza ibiti bishaje. Kuri ubu, hegitari 4,100 zimaze gusimbuzwa ibiti bishya bya RAB C15, kandi hateganyijwe hazongerwaho hegitari 1,000 buri mwaka.

Mu rwego rwo kumenyekanisha ikawa y’u Rwanda, NAEB ikomeza gufatanya n’abafatanyabikorwa mu bikorwa nk’irushanwa rya Best of Rwanda Coffee Competition, ryitabiriwe n’abaguzi 78 bo mu bihugu 25, aho ikawa ya K Organics yo mu karere ka Huye yagurishijwe ku 88.18$ kuri kilo, igiciro cyo hejuru mu mateka y’iryo rushanwa.

Mu mwaka wa 2024, u Rwanda rwabonye umusaruro wa kawa ungana na Toni 21,295, ikawa yanyowe mu gihugu ingana na 5%. Kuri ubu imibare itagazwa n’ n’Ikigo cy’Igihugu gishinzwe guteza imbere ibyoherezwa mu mahanga bikomoka ku buhinzi (NAEB) igaragaza ko mu Rwanda habarurwa ibiti by’ikawa 100,000,000 harimo ibiti bishaje bigera kuri Miliyoni 26,000,000 bikeneye kuvugururwa.

Bizimana Claude, Umuyobozi Mukuru w’Ikigo cy’Igihugu gishinzwe guteza imbere ibyoherezwa mu mahanga bikomoka ku buhinzi n'Ubworozi (NAEB)

Mu bikorwa byaranze uwo munsi, harimo gutera ibiti by’imbuto ziribwa, kugaburira abana bato amafunguro agizwe n’indyo yuzuye mu rwego rwo kurwanya imirire mibi n’igwingira, gutanga amatungo magufi n’amaremare arimo ihene n’inka, ndetse no kumurika umusaruro w’ubuhinzi n’ubworozi.

Akarere ka Nyamagabe, kizihirijwemo uyu munsi ku rwego rw’igihugu, gafite abakene bangana na 51%, ariko kakaba kandi gashimirwa kuba kamaze gutera intambwe mu kuzamura imibereho y’abagatuye.

Bamwe mu baturage bo mu karere ka Nyamagabe batangaza ko batangiye urugamba rwo guharanira kugira imirire iboneye mu baturage nkuko byemezwa na Musabyimana Anathalie

Ati: “Koperative yacu ikora cyane kugira ngo twongere umusaruro mu bwinshi no mu bwiza. Iyo tubisaruye, abaturage bahahira ku masoko, ndetse n’abo bafite amikoro make bashobora kubona ibyo kurya bihagije. Ni urugamba twatangiye kugira ngo buri wese agire ifunguro riboneye.”

Uwihanganye Samuel avuga ko ibikorwa byabo bigamije kongera umusaruro w’ubuhinzi no guteza imbere agaciro k’umusaruro bifasha abaturage kubona ibiribwa bihagije, ndetse bikongera intungamubiri ku bana n’abagore batwite.

Ati: “Dukora ibikorwa byo kongerera agaciro umusaruro, dutunganya ifu nziza y’igikoma ikunze gukoreshwa n’abagore batwite ikabongerera intungamubiri. Iyi fu igera no mu mashuri y’abana, bityo ikageza ku mirire iboneye kandi igatanga umusaruro ugaragara.”

Minisitiri w’ubuhinzi n’ubworozi Dr Marc Cyubahiro Bagabe yavuze ko kwizihiza uyu munsi bihuriranye n’igihe imvura itaraguye neza mu bice bimwe by’igihugu, asaba abahinzi n’aborozi gukoresha neza amahirwe y’imvura yabonetse.

Ati: “Kwizihiza Umunsi Mpuzamahanga w’Ibiribwa bihuriranye n’ikibazo cy’imvura itaraguye neza mu bice bimwe 3 by’Igihugu. Ni muri urwo rwego mboneyeho gushishikariza abahinzi n’aborozi kongera imbaraga mu bikorwa bigamije kuzamura umusaruro w’Igihembwe cy’ihinga mu bice by’Igihugu byagize imvura ishimishije, hitabwa ku gufumbira imyaka, kuyibagarira, kurwanya indwara n’ibyonnyi, no gukurikiza inama zose bagirwa n’inzego zishinzwe ubuhinzi; ndetse no gufata amazi y’imvura ibonetse, akazifashishwa mu kuhira imyaka n’amatungo igihe icitse kare;”

Minisitiri Bagabe yanibukije abaturage ko gufata ubwishingizi ku bihingwa n’amatungo ari ingenzi mu kubarinda ingaruka ziterwa n’imihindagurikire y’ibihe.

Ati: “Kurushaho kwitabira gahunda y’ubwishingizi ku bihingwa n’amatungo. Guverinoma itanga Nkunganire ya 40% mu gufasha abahinzi n’ubworozi kubona ubwishingizi ku bihingwa n’amatungo yabo. Nagirango mbonereho no kwibutsa aborozi ko amatungo agomba kororerwa mubiraro, kuko bifite inyungu nyinshi, zirimo gufasha kubona ifumbire igira umumaro mu buhinzi, kugabanyiriza amatungo ibyago byo kwandura indwara z’ibyorezo no kubikwirakwiza, no kongera umusaruro atanga.”

Intego z’Umuryango w’Abibumbye z’Iterambere rirambye (SDGs) kugeza mu mwaka wa 2030, zishyira imbere kurandura inzara, kugera ku mutekano w’ibiribwa no guteza imbere ubuhinzi bukorwa kinyamwuga.

Ariko, nubwo izi gahunda zihari, isi iracyafite abantu barenga miliyoni 700 bafite ikibazo cy’inzara, bituma hakenewe ubufatanye n’imbaraga z’abaturage bose mu guteza imbere ubuhinzi n’imirire iboneye.

Hatanzwe amatungo magufi n’amaremare arimo ihene n’inka

Minisitiri w’ubuhinzi n’ubworozi Dr Marc Cyubahiro Bagabe yasabye abaturage gukora cyane

Hatewe n'ibiti by'imbuto ziribwa

Mu mwanya wa kabiri haza Ubushinwa, bufite hafi miliyoni 132 z’ihene, bukaba kandi n’igihugu cya mbere ku isi mu musaruro w’inyama z’ihene kuko gitunganya toni 2.4 miliyoni buri mwaka, nk’uko byatangajwe muri FAO Livestock Primary Dataset 2023.

Dr. Maria Helena Semedo, Umuyobozi Wungirije wa FAO ushinzwe Ibidukikije n’Ubuhinzi, yagize ati: “Ihene ni kimwe mu matungo yihanganira ubushyuhe n’amapfa, kandi ni ingenzi cyane mu bukungu bw’ibihugu bifite ibice byumye. Zigira uruhare mu kurwanya inzara no guteza imbere ubukungu bushingiye ku buhinzi.”

Nyuma y’u Bushinwa haza Nijeriya, Pakisitani, Bangaladeshi na Ethiopiya, aho buri gihugu gifite hagati ya miliyoni 40 na 88 z’ihene.

Uretse umubare w’amatungo, ibihugu bimwe byiyongera mu musaruro nyirizina. FAO, muri raporo yayo yitwa Global Livestock Production 2023, ivuga ko U Bushinwa, U Buhinde na Pakisitani ari byo biyoboye mu gutanga inyama nyinshi z’ihene, mu gihe U Buhinde, Sudani na Pakisitani ari byo biri imbere mu musaruro w’amata y’ihene.

Mu mwaka wa 2022, U Buhinde bwonyine bwatanze amata y’ihene agera kuri toni 6.2 miliyoni, Sudani ikagira toni 1.1 miliyoni, naho Pakisitani ikagera kuri toni 1.0 miliyoni (FAO, 2023).

Nk’uko byanditswe na Science Agri Journal mu mwaka wa 2023 mu bushakashatsi bwayo Global Goat Population and Production Trends (2010–2022), hafi 75% by’ihene zose ku isi ziri muri Aziya, cyane cyane mu Buhinde, Ubushinwa na Pakisitani, naho Aziya n’Afurika byose hamwe bifite 87% by’ihene z’isi yose.

Dr. Khalid Hassan, impuguke mu bworozi bwo muri Aziya yanditse muri iyo raporo ati:

“Nubwo ibihugu byinshi bifite ihene nyinshi, umusaruro wazo ntuhwanye bitewe n’amoko y’ihene, uburyo bwo kuzitunga n’ikoranabuhanga ritari rihagije. Ariko ihene zigenda zigaragara nk’igikoresho cy’ingenzi mu guhangana n’imihindagurikire y’ibihe.”

Abahanga bavuga ko ubworozi bw’ihene bukomeje gufatwa nk’isoko y’iterambere ry’icyaro, cyane cyane mu bihugu bikiri mu nzira y’amajyambere, kuko zitanga ibikomoka ku matungo bitandukanye kandi zikihanganira ibihe bikomeye by’ubushyuhe.

Ati: “Natangiriye ku gitekerezo cyoroheje. Nari mfite ubutaka butarimo ibiti byinshi, mpitamo guhinga urutoki rwa Fiya n’Ingójwa, mbona bigenda neza. Ntabwo byantwaye igihe kinini kugira ngo mbone ko ubuhinzi bushobora guhindura ubuzima.”

Ubu, urutoki rwa Bimenyimana rutanga umusaruro uhagije ku buryo buri cyumweru asarura ibitoki bigezwa ku masoko atandukanye, cyane cyane mu Mujyi wa Kigali, aho afite abakiriya batandukanye b’ingójwa ndetse n’imitobe.

Ati: “Nta cyumweru gishira ntasaruye ibitoki. Ngemura ibitoki by’ingojwa i Kigali kuko mfiteyo abakiliya benshi cyane, ikindi kandi nkunda kwenga inshuro nyinshi ku buryo ngemura imitobe myinshi muri Kigali n’ahandi. Ibi bituma nshobora kwinjiza amafaranga anyemerera gutunga umuryango wanjye neza, kandi byanamfashije kwiyubakira inzu nziza ntuyemo ubu sinkodesha binamfasha kandi no gutangira indi mishinga nk’ubuhinzi bw’ibisheke n’amashyamba.” 

Uretse ubuhinzi bw’urutoki, Bimenyimana avuga ko akorana neza n’ibigo by’imari, byamufashije kugera ku iterambere yifuzaga. 

Ati: “Natangiye ngurizwa ibihumbi 400 na SACCO Imarabukene Ngamba, nyishyura neza. Nyuma bampa Miliyoni 1, nanayishyura neza. Nageze no ku rwego rwo kubona inguzanyo ya Miliyoni 3, none ubu ngeze ku rwego rwo gusaba Miliyoni 5 kuko ubuhinzi bwanjye bumeze neza kandi nishyura neza.”

Bimenyimana avuga ko urugendo rwe rwamwigishije byinshi ku buhinzi, by’umwihariko ku bijyanye no gukoresha neza ubutaka umuntu afite, atitaye ku buryo bumeze.

Ati: “Ntampamvu yo kwinubira ubutaka, nararebye nsanga ubutaka bw’aho dutuye bwakeramo urutoki ntitengagije ko hari abo mu tundi duce twigihugu bahinga ibindi kandi ubona bibakijije, ariko ngwee nahisemo guhinga urutoki kuko nabonye rwera hano iwacu ku buryo ubu naguye ibitekerezo byanjye nkaba naratangiye n’umushinga wo guhinga ibisheke bitewe nuko nabyo byera hano cyane ko twegereye umugezi wa nyabarongo ntabwo nzabura amazi.”

Avuga kandi ko icyizere ari cyo cyamugejeje aho ari ubu: “Ntawe ukwiye gutinya gutangira umushinga muto. Iyo ufite icyizere n’ubushake, amahirwe arisukiranya. Urubyiruko rukwiye kumva ko imbaraga zabo ari zo zizatuma bagera ku iterambere, si ugutegereza akazi gusa.”

Inkuru ya Bimenyimana François ni urugero rw’umuhinzi wagaragaje ko n’umushinga muto ushobora kwaguka ukagera ku rwego rwo hejuru. Yerekanye ko guhanga udushya, gukorana n’ibigo by’imari, no kugira icyizere mu byo umuntu akora, bishobora guhindura ubuzima burundu.

Yatangiriye ku bihumbi 600 Frw gusa, ubu afite urutoki rufite agaciro ka miliyoni 20

Nta butaka bubi buhari, ni uko tutabukoresha Bimenyimana François, umuhinzi w’urutoki wahinduye ubuzima bwe muri Ngamba, Kamonyi

Ku butaka abandi batabonagamo icyizere, Bimenyimana François yahavumbuye inzira y’ubukire binyuze mu rutoki

Yagize ati: "Mbere ya 2018, iki gishanga cyahingwaga mu buryo bw'akajagari; buri wese yahingaga uko abyumva kandi igihe ashakiye, ariko n’ubwo abantu bahingaga, hari benshi bacwaga n’inzara, abandi bakaragiramo amatungo. Ubu, kubera ubufasha bwa Leta mu ishwagara, ifumbire n’imbuto ihagije, turasarura toni 5 n’ibiro 200 by’ibigori kuri Hegitare ndetse na toni 25 z’ibirayi kuri Hegitare."

Minisitiri w’Ubuhinzi n’Ubworozi, Dr. Marc Cyubahiro Bagabe, yasobanuye ko umusaruro w’aba bahinzi ushobora kuzamuka ukagera kuri toni 10, ariko agaragaza ibyakorwa nuko byakorwa kugirango uwo musaruro wiyongere.

Ati: "Iyo utinze mu kubagara, icyumweru kimwe gusa bishobora gutuma umusaruro utagera ku ntego. Tugomba kubagarira icyarimwe, dushyiremo ifumbire ihagije kandi turwanye n’ibyonnyi kugira ngo tubone umusaruro mwiza."

Minisitiri w’Intebe Dr. Nsengiyumva yasabye abaturage gukomeza kongera umusaruro w’ibigori, akagira ati: "Twifuza ko umusaruro w’ibigori wiyongera ukagera kuri toni 10 kuri Hegitare. Nanone, ndabasaba no guhinga ahandi hose hashoboka kugira ngo twongere umusaruro w’ibiribwa mu gihugu."

Yongeyeho ko binyuze muri Minisiteri y’Ubuhinzi n’Ubworozi, aba bahinzi bazahabwa abagoronome b’abahugura mu gucunga neza iki gishanga, hagamijwe kuzamura umusaruro.

Koperative abishyizehamwe Urwonjya bakorera muri iki gishanga cy’Urwonjya, igizwe n’abanyamuryango 1,742 bakaba bakorera kuri Hegitare 115 zateguwe neza.

Mu karere ka nyaruguru ibihingwa ngandurarugo bihingwa kuri Hegitare 55,000 byiganjemo igori n’ibirayi bihingwa mu mirenge 14 igize aka karere.

Minisitiri w’Intebe yatangije igihembwe cy’ihinga cya 2026A mu gishanga cy’Urwonjya

Abahinzi 1,742 ba Koperative Abishyizehamwe Urwonjya bakorera ku Hegitare 115, bagaragaza ubufatanye bwa Leta n’abaturage mu kuzamura umusaruro

Minisitiri w’Intebe Dr. Nsengiyumva asaba abaturage gukomeza guhinga no kongera umusaruro w’ibigori kugera kuri toni 10 kuri Hegitare

Ati: “Nari mfite umurima ku musozi muremure uhanamye kandi uriho amabuye menshi. Natekerezaga ko ntazigera mpakura umusaruro uhagije honyine, ariko nagize igitekerezo cyo kugerageza no guhinga inanasi”.

Yatangiriye ubuhinzi bw’inanasi kuri hegitare ebyiri gusa, nyuma aza kongeraho indi hegitare imwe n’igice, kuko yari amaze kubona ko inanasi zishobora kwera no ku butaka bumeze bityo.

Ati: “Ntabwo nigeze ngira ubutaka bwiza nk’uko abandi babuvuga, ariko nabubonye nk’igisubizo. Niyemeje kubukoresha uko bumeze kose kuko aribwo mfite. Ubutaka bwose buba bufite icyo bukeneye kugira ngo bwere, ni twe tubugenera ibyo bukeneye,”.

Mu rugendo rwe, yahereye ku nguzanyo ya miliyoni eshatu (3,000,000 Frw) yaguze yahawe SACCO, ayakoresha mu gutunganya umurima, kugura imbuto n’isaso yo kwifashisha. Ibyo byatumye ubuhinzi bwe butangira kwera imbuto nziza kurenza uko yabyibwiraga.

“Inanasi zanjye zatangaje benshi. Nta cyumweru ndangiza ntasaruyemo, kandi nta n’imwe iguma mu murima itaguzwe. Abaguzi bansanga mu murima, izindi nkazijyana mu masoko yo muri Kamonyi, ndetse no mu gihe cy’umwero, abacuruzi b’i Kigali barazirangura”.

Ubu, umusaruro we umwinjiriza amafaranga arenga miliyoni eshanu (5,000,000 Frw) buri mwaka, akaba ari byo bimufasha gutunga urugo no gukomeza kwagura umushinga we.

N’ubwo afite ibibazo bimwe na bimwe, cyane cyane byo kubona isaso yo kwifashisha mu gutunganya inanasi, avuga ko iyo ibonetse aba abonye n’ifumbire kuko iyo isaso imaze kubora ihinduka ifumbire y’imbore ishyirwa mu murima.

Munganyimana atanga inama ku bandi bahinzi n’urubyiruko. Ati: “Ntukagire ubwoba bwo gutangira umushinga. Icyo ugomba gukora ni ukugira icyizere ko bishoboka aho kwibwira ko bidashoboka. Urubyiruko rugomba kujya rugana ibigo by’imari, rukagerageza gushyira mu bikorwa ibitekerezo rwaba rufite kuko imyaka yabo ari iyo kugerageza buri kintu.”

Yongera gusaba abahinzi kutavuga nabi ubutaka bwabo ahubwo bakabugenera icyo bukeneye kugira ngo bwere.

Ati: “Ubutaka ntabwo ari bwo butera ngo bube bubi, ahubwo ni twe tubugenera icyo buzakora. Iyo ubuhaye ibyo bukeneye, buragutunga,”

Inkuru ya Munganyimana Bertin ni isomo rikomeye ku bahinzi bose ndetse no ku rubyiruko. Yerekanye ko nta butaka bubi buhari, ahubwo habaho uburyo bwo kubukoresha neza. Ubutwari n’ubushake bye byatumye ubutaka bwatekerezwaga nk’aho ntacyo bwatanga bumutunga kandi n’abandi benshi bagomba kubyigira ho bakamenya ko ubuhinzi bushobora gutanga ibisubizo bikomeye mu mibereho yabo.

Gukunda ubutaka bwawe no kudatinya kugerageza ibishya, ni byo byamuhaye ubukire

Ahantu abandi babona ibibuye gusa, Munganyimana abona amahirwe y’ubukire

Inanasi ziva ku butaka bugaragara nk’ubukakaye, ariko zizana ibyishimo n’umusaruro ufatika.

Umuhinzi w’inararibonye, watinyutse guhindura ubutaka bugaragara nk’ubukakaye, akabuhindura umutungo

Ati: “Natangiye gukorana na SACCO IMARABUKENE Ngamba nkora ubucuruzi bwa butiki, ariko nyuma nsanga bitagenda neza mpitamo kwinjira mu buhinzi bw’ibisheke. Nagujije ibihumbi magana atatu nabyishyura neza, nongera nsaba andi ngura umurima nkomeza guhinga ibisheke. Ubu ngeze ku rwego rwo kuba nasaba miliyoni eshanu kandi nkayishyura neza. Nshishikariza n’abandi baturage kugana ibigo by’imari kuko bidufasha gutera imbere.”

Niragire Florence, umuhinzi w’ibisheke utuye mu Kagari ka Kabuga

Bimenyimana François, umuhinzi w’urutoki, nawe yemeza ko iterambere rye ryagizwemo uruhare na SACCO. Ati: “Maze imyaka irenga 8 nkorana na SACCO. Natangiye mfite ubushobozi bucye kandi nkeneye amafumbire n’imbuto nziza. Nahawe inguzanyo ya miliyoni 3, none ubu mfite urutoki rufite agaciro ka miliyoni zisaga 20. Ngeze ku rwego rwo kugemurira ibitoki n’imitobe mu Mujyi wa Kigali, mfite amasoko ahamye.”

Uwababyeyi Eline, Umucungamutungo wa SACCO IMARABUKENE Ngamba, avuga ko bahura n’imbogamizi zo kugera ku baturage bose ariko bakomeje gukora ibishoboka:

“Biranatugora gukora ubukangurambaga mu Murenge wose kuko utagendeka neza, ariko dukorana n’ubuyobozi bw’inzego z’ibanze mu nteko z’abaturage no mu makoperative. Tubakangurira guhera kuri bike bafite, bagakora ibikorwa bibyara inyungu. Ubu tubona umusaruro w’ibi bikorwa kuko abaturage barimo barushaho gusobanukirwa gahunda yo gukorana n’ibigo by’imari hagamijwe kwikura mu bukene.”

Mudahemuka Jean Damascène, Umunyamabanga Nshingwabikorwa w’Umurenge wa Ngamba, yashimye uruhare rwa SACCO IMARABUKENE:

Ati: “SACCO ni uburyo bwiza bwo gufasha abaturage gukabya indoto zabo zo kwiteza imbere. Ibafasha kubona aho bakura amafaranga hafi yabo kandi mu mutekano. Banahabwa inama ku bijyanye no gucunga imishinga yabo n’uko bashora imari. Turasaba abaturage kurushaho kugana iki kigo kuko amafaranga yabo abikwa mu mutekano kandi bizabafasha kugirirwa icyizere, bakagurizwa, bakongera imishinga, bityo bakagira ubukire.”

Mu rwego rw’igihugu, ubushakashatsi bwa FinScope 2024 bwerekana ko 96 % by’Abanyarwanda bakoresha serivisi z’imari kandi abarenga miliyoni 3 ari abanyamuryango ba Umurenge SACCOs 416 ziri hirya no hino mu gihugu.

Uru rwego rwa microfinance rufite umutungo wiyongereye ku kigero cya 39,4 % mu mwaka wa 2024, ndetse n’inguzanyo zisigaye zazamutse ku gipimo cya 39,5 %, bigaragaza ko abaturage barushaho gukoresha neza amahirwe yo kwiteza imbere.

Ibi bipimo bigaragaza ko nk’uko byabaye ku bahinzi bo mu Murenge wa Ngamba, gahunda za SACCOs zikomeje kuba imbarutso y’iterambere, zigafasha abaturage guhera kuri bike bafite bakazamuka bakagera ku rwego rwo gushora imari nini no kongera umutungo wabo mu buryo burambye.

Bimenyimana François avuga ko yatangiye ubuhinzi bw'urutoki yihingira bisanzwe ariko nyuma yo kwiyambaza SACCO afite urutoki rufite agaciro k'asaga Miliyoni 20 z'amafaranga y'u Rwanda

Uwababyeyi Eline, Umucungamutungo wa SACCO IMARABUKENE Ngamba

Mudahemuka Jean Damascène, Umunyamabanga Nshingwabikorwa w’Umurenge wa Ngamba, yashimye uruhare rwa SACCO ku baturage b'umurenge ayoboye

Yagize ati: “Urugendo rwacu ntirwibanda gusa ku gutunganya urusenda, ahubwo ni uguha agaciro urukundo rw’ibirungo nyafurika no guha imbaraga imiryango y’aho dukorera.”

Undi wagaragaje umushinga we ni Irakoze Christian, uri gutangiza ubuhinzi bw’inkeri hakoreshejwe uburyo bwa bwo guhinga hakoreshejwe amazi avanze n’ifumbire. Avuga ko kuri ubu asabwa arenga miliyoni 400 z’amafaranga y’u Rwanda kugira ngo azamure uyu mushinga we wihariye mu buhinzi.

Yagize ati: “Ubuhinzi bwo guhinga hakoreshejwe ukuvanga amazi n’ifumbire butanga igisubizo kirambye ku bibazo by’ubuhinzi, kandi dufashijwe uko bikwiye, dushobora guhindura uburyo duhinga mu Rwanda.”

Intumwa z’u Rwanda muri irihuriro ku ruhererekane rw’ibiribwa ku mugabane wa Afurika zisaga 30, zerekanye ibicuruzwa byazo ndetse zinitabira ibiganiro byibanze k’ukubona ibisubizo ku mbogamizi zerekeranye no kubona inguzanyo mu Rwanda.

Ambasaderi w’u Rwanda muri Senegal, wayoboye imurikabikorwa ry’imishinga y’urubyiruko, yashimangiye uruhare rukomeye rw’urubyiruko mu guhindura ubuhinzi.

Yagize ati: “Mwe mwese mwazanye imishinga yanyu, ubwitange, n’ubuhanga bwanyu biradutera ishema. Mudukangurira ko urubyiruko rwa Afurika n’ubucuruzi buto bifite ubushobozi bukomeye.” Yakomeje agira ati: “Iki gikorwa cyo gusobanura imishinga ntikiri urukurikirane rw’ibiganiro gusa, ahubwo ni intambwe ikomeye mu rugendo duhuriyeho rwo guhindura gahunda zigendanye n’ibiribwa binyuze mu buhanga bushya.”

Ambasaderi kandi yibukije amagambo ya Perezida Kagame ku kwigira, agira ati: “Nk’uko Perezida Kagame akunze kutwibutsa, icyubahiro no kwigira bigomba kutuyobora. Ahazaza ha Afurika ntihari mu gutegereza inkunga z’amahanga, ahubwo hari mu bushobozi bwacu bwo guhagarara twemye, guhanga udushya, kurema no guhatana ku rwego rumwe n’isi yose.”

Iyi nama yagaragaje akamaro k’urubyiruko mu buhinzi, hatangwa n’imihigo ikomeye yo gushyigikira abashoramari bato. Iyi gahunda y’ibiganiro nk’ibi yafashije mu ikorwa ry’inama zirenga 60 zihuje abafite imishinga mito n’iciriritse n’abashoramari, aho abitabiriye basabaga amafaranga angana na miliyoni 70 z’amadolari ya Amerika. Mu Rwanda habaye ahantu hihariye ho gufasha imishinga mito n’iciriritse y’u Rwanda kubona uburyo bwo guhabwa inkunga, kwerekana ibicuruzwa no gusobanurira abashoramari imishinga yabo.

Muri rusange, Ihuriro nyafurika ryiga ku ruhererekane rw’ibiribwa ry’uyu mwaka wa 2025 ryagaragaje ubushobozi bwo guhindura ubuhinzi bufite imishinga iyobowe n’urubyiruko muri Afurika, ishimangira ko hakenewe ishoramari n’inkunga bikomeye kugira ngo habeho iterambere rirambye mu buhinzi. 

Gashonga Tresor, Umuyobozi Mukuru wa Incuti Foods, asobanura umushinga we wo kongerera agaciro urusenda

Irakoze Christian agaragaza uburyo bwa hydroponics mu guhinga inkeri nk’igisubizo kirambye ku buhinzi.

Festus Bizimana, Ambasaderi w’u Rwanda muri Senegal ashimira urubyiruko rwagejeje imishinga yabo imbere y’abashoramari n’abafatanyabikorwa

Undi muhinzi, Ndagijimana Laurent, na we yunzemo ati: “Imyaka yacu irahangirikira buri gihe. Twifuza ko ubuyobozi bwatwunganira mu gusibura no gutunganya umugezi kugira ngo amazi atazongera kudutwara imyaka kuko imbaraga zacu ubwacu ntizihagije” 

Umugezi wa bahimba mu gihe cy'imvura nyinshi wajyaga wuzura ukarengera imyaka y'abaturage ikangirika

Umuyobozi wungirije w’Akarere ka Rulindo ushinzwe Iterambere ry’Ubukungu, Bwana Rugerinyange Theoneste, yavuze ko iki kibazo ikibazo cy’uyu mugezi cyashakiwe umuti urambye uzakemura ikibazo cy’umwuzure wajyaga utera abahinzi.

Ati: “Twabikozeho ubuvugizi dufatanije na Minisiteri y’Ubuhinzi n’Ubworozi na RAB, kandi byatanze umusaruro. Hari umushinga w’ikigo cy’Abanyakoreya, KOICA, uzatangira mu mwaka wa 2026 wo gutunganya uyu mugezi no kuwagura. Hazashyirwamo n’imiyoboro mishya kugira ngo amazi atazongera kuzura mu mirima.”

Rugerinyange Theoneste, Umuyobozi wungirije ushinzwe iterambere ry'Ubukungu mu karere ka Rulindo

Yakomeje avuga ko hari n’undi mushinga uzashyirwa mu bikorwa ku bufatanye na FONERWA ndetse na Green Fund, ugatangira mu kwezi k’Ukuboza uyu mwaka.

Ati: “Uyu mushinga uzakorera mu mirenge itanu yose ikora kuri iki gishanga, kandi uzatanga igisubizo kirambye ku kibazo cy’umwuzure.”

Umugezi wa Bahimba ureshya na Kilometero 23, uzengurutse igishanga cya bahimba, ukaba ukora ku mirenge 5 yo muri aka karere ka Rulindo ariyo Bushoki, Tumba, Rusiga, Base ndetse na Cyungo.

Ati: “Ikintu cyatumye ntekereza inkeri ni uko numvaga nifuza kugira igihingwa cyiza nahinga mu buryo burambye kandi umusaruro ukiyongera. Niyemeje kubikora kinyamwuga kugira ngo mbyaze amahirwe umusaruro,”

Avuga ko icyatumye afata icyemezo cyo guhinga inkeri gusa aruko yashakaga kugira ikintu yahinga mu buryo burambye 

Christian yihariye mu buhinzi bwa hydroponics, uburyo bwo guhinga udakoresha igitaka, ahubwo ibihingwa bigahabwa ibyo bikenera byose binyuze mu mazi. Ni uburyo bugezweho aho ushobora guhinga hejuru cyangwa hasi, bikagabanya ibyago byo guhura n’indwara zituruka mu butaka no kongera umusaruro ku buso buto.

Yatangiye ahinga ibihingwa bitandukanye birimo inyanya, poivron, intoryi, n’ibindi, ariko inkeri zamubereye igihingwa cyiza abona cyavamo umusaruro ufatika. Ubu afite ibihingwa 37.000 by’inkeri, kandi kuri buri gihingwa gishobora gutanga nibura ikiro kimwe cy’inkeri ku mwaka.

Ati: “Ikilo kimwe cy’inkeri gishobora kugura amafaranga arenga ibihumbi 5,000, ariko ashobora no kurenga bitewe n’uburyo wahinzemo.”

Nubwo atigeze yiga mu mashuri yihariye ajyanye n’ubuhinzi, Irakoze avuga ko ubumenyi afite yabubonye mu mugambi w’imihangayiko n’ubushake bwo kwiga buri munsi.

Ati: “Nta shuri nigeze nigamo ibijyanye n’ubuhinzi ariko buri munsi nibwiraga ko amahirwe ari mu kwiga ibyo nkora neza. Uko nageragezaga, nakomezaga kubyigiramo birangira niyemeje ubuhinzi ndanabwiyegurira.”

Ikilo kimwe cy’inkeri gishobora kugura amafaranga arenga ibihumbi 5,000

Christian avuga ko kugirango ubuhinzi bwe bugende neza anabone umusaruro byamusabye gukora uburyo bw’ikoranabuhanga mu kuhira aho akoresha amazi avanze n’ifumbire bikagera ku gihingwa byose bipimye kandi bigakorwa mu buryo bw’ikoranabuhanga kuko bidakenera umuntu uza kubikoresha. 

Ati: “kugirango ubuhinzi bwanjye bugende neza nkoresha ikoranabuhanga mu kuhira aho dukoresha ikoranabuhanga ryuhira amazi avanze n’ifumbire kandi byose bigakorerwa rimwe, ntabwo bikenera umuntu uza gushyiraho ifumbire no gusunika amazi, ahubwo byose birikora dukoresheje imashini yabugenewe twakoze kandi byifungura mu masaha tuba twarabigeneye”

Ku mpungenge zuko iri koranabuhanga ritagabanije abakozi mu kazi, Christian avuga ko iri koranabuhanga ritigeze rigabanya abakozi ahubwo ryongereye umwanya wo kwita ku yindi mirimo.

Ati: “Ntabwo iri koranabuhanga ryagize ingaruka kubakozi, ryagabanije umwanya w’umurimo wo gusunika amazi ahubwo ryongera umwanya wo kwita kuyindi mirimo”

Christian asaba urubyiruko kudasubira inyuma kubera gutinya intangiriro.
Ati: “Ntugatinye gutangira. N’iyo watangira uhereye ku kantu gato, ni amasomo y’ingenzi akuganisha ku ntera ukwiye kugeraho.”

Uyu musore w’inyota y’udushya amaze gutoranywa mu bazitabira Ihuriro Nyafurika ku ruhererekane rw’ibiribwa (Africa Food Systems Summit 2025), Kuri we, ni intambwe ikomeye ndetse ni n’amahirwe yo kumenyana n’abandi ba Rwiyemezamirimo bo ku mugabane wa Afrika no kubabyaza amahirwe.

Ati: “Ni amahirwe yo kubona ibikorwa by’iterambere ku mugabane w’Afurika, guhura n’abakora ubuhinzi hirya no hino no kongera ubumenyi. Ibyo bizamfasha kwagura ibyo nkora no kubyaza amahirwe ubundi bushobozi.”

Kuri ubu Irakoze Christian akoresha abakozi 29 bahoraho mu bikorwa bye by’ubuhinzi bw’inkeri kandi n’abaturage bahaturiye bahagirira amahirwe yo kubona imbuto ndetse n’ibiraka kenshi iyo byabonetse.

Akoresha ikoranabuhanga mu kuhira aho dukoresha ikoranabuhanga ryuhira amazi avanze n’ifumbire 

Akorera ubuhinzi bwe ku buso bungana na Hegitari imwe

Afite gahunda yo kwagura ubuso ahingaho mu gihe kiri imbere

Na Sibomana Jean Baptiste wo mu Karere ka Rulindo, yunzemo agira ati:
“Iyi ni inkuru nziza kuba aka karere kashyizwe mu turere twahawe nkunganire ku ishwagara. Ubundi twajyaga duhabwa nkunganire ku mbuto z’ibigori no ku ifumbire mvaruganda, ariko ishwagara tukayigura 100%. Hari n’abantu batajyaga bayikoresha kubera ko ihenze, none bagiye kuyikoresha. Turizera ko umusaruro ugiye kwiyongera.”

Dr Uwamahoro Florence, Umuyobozi Mukuru Wungirije ushinzwe Ubuhinzi mu Kigo cy’Igihugu Gishinzwe Guteza Imbere Ubuhinzi n’Ubworozi (RAB), asobanura ko icyemezo gishingiye ku bushakashatsi bwakozwe bukagaragaza ibice bikeneye kongerwamo ishwagara kubera ko ubutaka bwaho bufite ubusharire bwinshi.

Ati: “Hakurikijwe ubushakashatsi ku miterere y’ubutaka bw’u Rwanda, byagaragaye ko hari uturere tugomba kwiyongera mu duhabwa ishwagara kugira ngo tugabanye ubusharire bw’ubutaka. Iyo ubutaka bufite ubusharire, inyongeramusaruro zose washyiramo ntacyo zikora. Ni yo mpamvu twongereye uturere duhabwa nkunganire, dukava ku 10 tugera kuri 22.”

Dr Uwamahoro Florence, Umuyobozi mukuru wungirije ushinzwe ubuhinzi muri RAB

Dr Uwamahoro yasabye kandi abahinzi gutegura neza ubutaka kugirango bitegure neza umuhindo. Ati: “Ndibutsa abahinzi gutegura neza ubutaka muri iki gihe kugira ngo imvura y’umuhindo nigera hasi ihagije bazashobore guhinga neza, ndetse no kwiyandikisha vuba muri Smart Nkunganire kugira ngo babone inkunga ku gihe.”

Uturere twari dusanzwe duhabwa nkunganire ku ishagara ni uturera 10 turimo Nyamagabe, Nyaruguru, Nyanza, Gakenke, Gicumbi, Karongi, Ngororero, nyamasheke, Rusizi ndetse n’akarere ka Rutsiro.

Nyuma y’ubushakashatsi byagaragaye ko hari n’utundi turere dukeneye gukoresha ishwagara mu buhinzi ari nayo mpamvu hongewemo uturere 12 duzahabwa nkunganire ku ishwagara aritwo Muhanga, Ngoma, Kayonza, Kirehe, Huye, Gisagara, Ruhango, Nyabihu, Burera, Musanze, Rulindo na Gasabo

Iyi nkunganire nshya izafasha abahinzi b’u Rwanda kugabanya igishoro no kongera umusaruro, cyane cyane mu turere twari dufite ubusharire bw’ubutaka, ibi bikaba ari intambwe ikomeye mu guteza imbere ubuhinzi burambye.

Avuga ko uyu mushinga w’ubworozi bw’inkoko bawutangiye ari itsinda ryo kwizigamira ariko kuri ubu bakaba barihurije hamwe ari abantu 9 bagafatanya gukora ubu bworozi aho bahise bashinga kompanyi yitwa Golden Harvest Poultry Ltd.

Ati: “Twatangiye turi itsinda rito ryizigama,” asobanura, mu ijwi rye rituje ariko ryijimye cyane nk’uwibuka urugendo rwose, Ati: “Byadusabye igihe kugira ngo twemeranye umushinga twakoramo. Nyuma y’ibiganiro byinshi, abantu icyenda twahisemo korora inkoko.”

Avuga ko yakuze yinkundira inkoko none byatumye akora umushinga mugari w'Ubworozi bwazo

Uyu mwanzuro waje kubahindurira ubuzima. Ubu bafite inkoko 2,500 bakaba bamaze imyaka 3 muri ubu bworozi, kandi niwo murimo ubatunze. Ati: “Uyu mushinga wahinduye ubuzima bwacu kandi niwo udutunze”

Urugendo rwe rwatangiriye mu buto. Ati: “Kuva cyera nakundaga inkoko,” aravuga agaseka buhoro, ati: “nabonaga n’iwacu bazorora. Ibyo byatumye mpanga umugambi wo kuzabikora kinyamwuga. Ubu ndishimira ko nabigezeho.”

Iyo utambagiye mu bworozi bwabo, ubona ubuziranenge bw’uyu mushinga, ibiraro byateguwe neza, amazi mu bigega, ibiryo bipimwe neza, aho zirira hasa neza kandi harimo urumuri rwiza ndetse n’ahantu heza inkoko ziterera amagi. Buri kimwe kirerekana ko uyu mushinga ari uw’umwuga.

Ubu, intego n’intumbero z’iyi kompanyi ni ukugera kure. Ati: “Turateganya kujya ku masoko mpuzamahanga ariko ubu twiyemeje kubanza guhaza isoko ry’imbere mu gihugu.”

Marie Claire atanga inama ku rubyiruko zo kudatinya gutangira umushinga kuko iyo uhereye kuri bikeya ufite umushinga ukura bikarangira ugeze kuri byinshi.

Ati: “Nimugire icyizere, muhere ku bike mufite. Nta mushinga munini utangira ari munini. Mukore ibishoboka, mube abizerwa, kandi mube indashyikirwa kuko birashoboka.”

Kuba yaratoranyijwe mu bazahagararira u Rwanda mu nama mpuzamahanga ku ruhererekane rw’ibiribwa yiswe Africa Food Systems Summit 2025 (AFSS25), abifata nk’intambwe ikomeye mu rugendo rwe kandi azungukiramo byinshi bizamufasha ndetse bikazanagirira akamaro abanyarwanda kuko azagarukana ubumenyi bwo kubasangiza.

Ati: “Abantoranyije bambonyemo ubushobozi bwo kugira icyo nasangiza. Aho ngiye nzasangiza abo mbonye ubunararibonye bwacu mu bworozi bw’inkoko, ariko nanjye ndifuza kwigira ku bandi bo muri Afurika kuko byanga bikunda hari byinshi bafite bagezeho twe tutarageraho, nzakurayo ubumenyi kandi nzagaruka mbusangize abanyarwanda kandi buzatugirira umumaro.”

Urebye aho ziba nuko zibayeho, bigaragara ko ari umushinga witaweho

Tuyishime Marie Claire avuga ko aho bageze Atari ku bwabo gusa ahubwo hari n’inzego ashimira zagiye zibafasha mu buzima bwa buri munsi bw’akazi kabo bakaba bageze aho bageze ubu.

Ati: “FAO yadufashije mu nkunga no kudufasha kubona amahirwe yo gukomeza iterambere bigendanye no kuduhugura uko dukora ubworozi bwacu kandi kinyamwuga, turashima kandi na AGRA iduha ubufasha bwa buri munsi no kumenya uko imirimo ikorwa no kutwitaho buri munsi ikanaduha inkunga zitandukanye, ndetse na RYAF itwongerera ubumenyi mu mahugurwa kandi ikaduhuza n’abafatanyabikorwa batuma imishinga yacu ikomera.”

Inkuru ya Marie Claire yerekana neza ko gukunda ibyo ukora, kubiharanira no gukorera hamwe bishobora guhindura ejo hawe. Mu maso ye, ubona icyizere cy’ejo hazaza hatarimo amayira abiri.

Afite inkoko 2500 kandi zorowe neza

Imishwi itumizwa mu gihugu cy'ubuholandi ikarerwa ku buryo ivamo nkoko nziza cyane

Nyirantibitonderwa Jeanne, umwe mu bahinzi, yagize ati: “Ntituzabona umusaruro kuko ibirayi bigiye gukurwa biteze. Ibi bizadutera igihombo gikomeye kuko ubusanzwe ku butaka bungana na are imwe twabaga twejeje ibiro 300, ariko ubu sinzi niba byibura twazabona kimwe cya kabiri.”

Ibi byanashimangiwe na Murorunkwere Letitia, nawe uri muri iyi koperative, aho yavuze ko ibiza bibasigiye ihungabana rikomeye. Ati:“Twari twizeye kubona umusaruro mwiza nk’uko bisanzwe, ariko iyi mvura yadutunguye. Twabuze uko twirwanaho, ubu dutegereje ubufasha kuko turi mu gihombo gikomeye.”

Ku ruhande rwa Radiant ikompanyi y’ubwishingizi aho aba bahinzi bafasha bwishinzi bw’ibihingwa byabo, bahumurije aba bahinzi ko bagiye kwishyurwa vuba kuko icyo bategereje ari raporo igaragaza ikiza cyabateye, ubuso bwangiritse ndetse n’ingaruka cyagize k’umusaruro wabo kandi iyo raporo izaboneka bitarenze kuwa gatanu taliki 22 Kanama 2025, bityo bakazishyurwa bitarenze iminsi 3 uhereye ku munsi raporo yabonekeyeho nkuko bisobanurwa na Mahoro Laetitia, Umuyobozi w’ishami ry’Ubwishingizi bw’ibihingwa n’amatungo muri Radiant Yacu.

Ati: “Abahinzi bafite ubwishingizi ntibakwiye kugira impungenge. Tuzishyura mu minsi itatu nyuma yo kubona raporo. Ibiza biva ku mihindagurikire y’ikirere, nta ruhare umuturage abigiramo, bityo bagomba kwishyurwa.”

Mahoro yakomeje agira ati: “Harimo gukorwa raporo igaragaza ikiza cyabayeho, ubuso bwangiritse ndetse n’ingaruka cyagize ku musaruro. Iyo raporo izaboneka ku wa gatanu tariki ya 22 Kanama 2025.”

Mahoro Laetitia, Umuyobozi w’ishami ry’Ubwishingizi bw’ibihingwa n’amatungo muri Radiant Yacu

Uyu muyobozi yasabye kandi abahinzi bose bakora ubuhinzi budafite ubwishingizi kwihutira kubugira kuko ibihe bihinduka bidateguza.

Ati: “Ibihe bihinduka ku buryo budateguza, ni yo mpamvu dukangurira abahinzi bose gufata ubwishingizi kugira ngo bikingire ingaruka z’ibiza nk’ibi.”

Igishanga cya bahimba cyose gifite ubuso bungana na hegitare 372 ariko ubuso buhingwaho bungana na hegitare 252, kikaba gihingwamo n’abahinzi 373. Mu bihe bisanzwe iyo nta biza byabayeho, iki gishanga cyeramo nibura ibirayi bingana na toni 6174.  

Evariste ntiyigeze atangira afite imashini zihenze cyangwa ibikoresho byinshi. Ahubwo yatangiye afite igitekerezo kimwe cy’ibanze: “Ese bishoboka ko ibyitwa imyanda bigira agaciro?”

Yibuka uburyo yatekereje bwa mbere kugira icyo akora mu bishishwa by’imyumbati:

Ati: “Kuko ntuye mu gace k’amayaga keramo imyumbati, Umunsi umwe nari mu rugo nkabona ibishishwa by’imyumbati bijugunywa. Ntekereza nti: ‘Ibi bintu ntibyashobora kugira akamaro?’ Nahise ntangira kwiga uburyo byahinduka ikintu gikoreshwa.”

Uko iminsi yicumaga, yagiye yiga ku ikoranabuhanga rituma ibishishwa by’imyumbati bihinduka isabune, kandi mu gihe gito abona ko ari igitekerezo gishobora guhindura byinshi.

Sibobugingo Evariste, amaze imyaka 6 atangiye umushinga wo gukora isabune mu bishishwa by'imyumbati

Mu Rwanda, imyumbati ni igihingwa gikunze guhingwa cyane, ariko ibishishwa byayo bikajugunywa. Evariste yabibonye nk’ikibazo ariko na none cyahindukamo amahirwe.

Ati: “Iyo urebye mu cyaro, usanga ibishishwa by’imyumbati byose bijugunywa kandi bifite imyunyu myinshi. Natekereje uburyo nakoresha ibyo abantu batarebyeho nk’ibihombo nkabibyaza akamaro.”

Iki gitekerezo cyamuhaye amahirwe yo guhanga umurimo uhamye ndetse no gutanga isura nshya ku bijyanye n’imicungire y’imyanda.

Sibobungingo avuga ko amaze kugira iki gitekerezo yashatse kugikuza ariko akanigira ku bandi babanje gukora ibikoresho by’isuku birimo isabune , amavuta n’ibindi ariko yagira icyo ababaza ku bigendanye n’amakuru bakamuca intege bikamutera kujya kwikorera ubushakashatsi. Yibuka igisubizo yahawe ubwo yari abajije umukoresha we ibijyanye nuko isabune ikorwa.

Ati: “Nabajije umukoresha wanjye uko isabune ikorwa kugirango nanjye nzajye niga uko babikora, maze arambwira ngo niba ushaka kubyikorera ntabwo uzigera ubimenya, icara hano ukore uzahembwa ariko ndakubwiza ukuri ko utazigera ubimenya”

Iyo bamaze gukora isabune bashyiraho ibirango

Avuga ko yahuye n’umwe mu bakire aho yakoreraga ariko agasiga amubwiye ati: “Uzakore byinshiiii, ariko niba wifuza gutera imbere uzakore ubushakashatsi ku mwumbati.”

Avuga ko amaze kumubwira ibi ntakindi yongeyeho yahise yigendera. Ibi byatumye agira imbaraga n’umuhate ku bishishwa by’imyumbati n’ubundi yahoraga ashaka kuba yabyaza umusaruro butuma asezera akazi ajya kwikorera ubushakashatsi bw’icyo yamaza ibyo bishishwa by’imyumbati byahoraga bijugunywa abireba.

Avuga ko yatangiye ubushakashatsi ku cyo yakoresha ibishishwa by’imyumbati mu mwaka wa 2018 aza kuburangiza muri 2021 aho yaje gusanga ibishishwa by’imyumbati bifite amavuta meza yifashishwa mu gukora isabune ndetse ibisigazwa byayo bikaba byavamo ifumbire nziza ikoreshwa mu buhinzi, aherako ahita yandikisha kampani mu kigo cy’igihugu gishinzwe iterambere (RDB).

Kugeza ubu, Sibobugingo Evariste afite uruganda ruto rutunganya isabune y’amazi ndetse n’isabune ikomeye ndetse n’ifumbire byose akora yifashishije ibishishwa by’imyumbati.

Avuga ko mu bikorwa bye byose akoresha abakozi 8 bahoraho ndetse n’abandi bakozi basaga 30 bakora bubyizi. avuga ko kuri bagera ku bahinzi 500 babazanira ibishishwa by’imyumbati ndetse n’abahinzi 3 bahinga ku buso bwa hegitari 30 kuzamura aho ajya kubyifatira aho bahinga kandi bafite intego yo kubikusanya mu gihugu hose kuko kuri ubu ikiro cy’ibishishwa by’imyumbati bakigura amafaranga 40.

Ibihembo n’intsinzi mu rugendo rwe

Kubera ibikorwa akora, yagiye ahabwa ibihembo bitandukanye birimo icyo yahawe muri 2019 muri Youth Connect Award aho umushinga we waje mu myanya 100 ya mbere ku rwego rwa afurika ahembwa 500,000 yahawe kandi n’igihembo mu irushanwa rya Imari Agri-Business Challenge icyiciro cya mbere ritegurwa na Imbuto Foundation aho umushinga we waje ku mwanya wa mbere agatsindira Miliyoni 10 z’amafaranga y’u Rwanda aho byamufashije kuzamura ibikorwa bye bikaba bigeze ku rwego rwiza.

Yagiye kandi apiganira amasoko hirya no hino ndetse anahabwa n’amashimwe mu bikorwa bitandukanye harimo n’amamurikagurisha ategurwa ku bikorwa by’ubuhinzi n’ubworozi.

 Sibobugingo Evariste afite intego zifatika zirimo kwagura uruganda rwe, gukora ku rwego mpuzamahanga no guteza imbere ibikorerwa mu Rwanda.

Ati: “Ndashaka kubona ibicuruzwa byanjye ku isoko mpuzamahanga, kandi ibyo bizashoboka binyuze mu kwagura ibikorwa no gukoresha ikoranabuhanga rigezweho.”

Isabune bakora ziba zipimye hakurikijwe amabwiriza y'Ikigo cy'igihugu gishinzwe ubuziranenge (RSB)

Evariste ni umwe mu rubyiruko 17 batoranijwe kuzitabira inama mpuzamahanga ku ruhererekane rw’ibiribwa yiswe Africa Food Systems Summit 2025 (AFSS25), izabera muri Senegal. Avuga ko ari amahirwe kuri we kuko azahungukira byinshi.

Ati: “Iyi nama izaba ari uburyo bwo kunguka ubumenyi no gusangiza abandi ubunararibonye. Nzabwira urubyiruko rwa Afurika ko amahirwe ari mu kureba aho abandi babona imyanda bayibyazamo ibikoresho byagirira umuntu akamaro, ikindi nitezemo nuko hari ubumenyi nzavoma kuri bagenzi banjye tuzahurirayo kandi iyo nzabakuraho nzabisangiza abanyarwanda.”

Evariste ashima Leta y’u Rwanda ibinyujije mu bigo n’imishinga itandukanye ndetse no gutanga amahirwe ku miryango itandukanye itari iya leta nka AGRA kuko yamuhaye ubufasha butandukanye bwagiye bumukomeza mu buryo bw’ubushobozi ubu akaba afite uruganda rufite icyerekezo.

Ati: “turashima Leta yadufashije ibinyujije mu bigo byayo bishinzwe gufasha abanhinzi b’urubyiruko nka RYAF ibi kandi byatumye AGRA itumenya idutera inkunga igaragarira buri wese harimo kuduha ubushobozi no kutuvugira aho tutagera kuri ubu tukaba dufite ibikorwa bifatika”

Evariste agira inama urubyiruko yo guha agaciro igitekerezo baba bafite kandi bagatinyuka bakagiha imbaraga kuko kwizera ko ibidashoboka bishobora gushoboka arizo mbaraga zagufasha gutsinda ibigeragezo by’ufite intumbero y’ubukire.

Ati: “Ntimukagire igitekerezo ngo mureke kugikurikira. Ikintu cyose gikomeye gitangira ari igitekerezo gisa n’aho ari gito yewe bamwe bakanabona ko kidashoboka. Gira icyizere, wigire ku bibazo biri hafi yawe, kuko ni byo bisubizo by’ejo hazaza kandi no kwizera ko ibidashoboka bishoboka.”

Ibishishwa by'imyumbati byari umwanda, Sibobugingo Evariste yabihinduye imari ishyushye

Isabune z'amazi zikorwa hifashishijwe ibishishwa by'imyumbati

Iyo zimaze gutungana bazipakira mu makarito bakazohereza ku isoko

Niyomugaba Vedaste, umwe mu bitabiriye, yavuze ko amasomo bahawe azamufasha guhindura uburyo yahingagamo

Ati: “Twahigiye uburyo bushya bwo gucunga neza umusaruro wacu. Ibi bizadufasha kubona igihingwa gifite ireme kandi kimeze neza kurusha uko byahoze.”

Mushimiyimana Iluminee nawe yemeza ko ibyo yahakuye ari byinshi kandi azabisangiza bagenzi be.

Ati: “Ntituzagumana ubumenyi tuvomye hano ahubwo tuzabusangiza abandi bagenzi bacu kugira ngo natwe tugire impinduka rusange.”

Umuyobozi Mukuru wa HoReCo, Iyamuremye Jack Dawson, yijeje ko amahugurwa atari iherezo ry’ubufatanye:

Ati: “Tuzakomeza gukorana n’aba bahinzi kugira ngo ibyo bigiye tubishyire mu bikorwa kandi bigire ingaruka nziza ku mibereho yabo.”

Umuyobozi Mukuru wa HoReCo, Iyamuremye Jack Dawson

Umuyobozi wa RAB Stasiyo ya Rubilizi, Ayinkamiye Agnes, yavuze ko aba bahinzi basabwe kuba kugira impinduka no kugira imikorere igezweho mu buhinzi mu mirima yabo

Ati: “Twiteze ko bazaba intumwa z’impinduka mu baturage aho batuye, bagahindura imyumvire ku gukoresha neza ibyanya byuhirwa.”

Umuyobozi wa RAB Stasiyo ya Rubilizi, Ayinkamiye Agnes

Kuri ubu mu Rwanda ubuhinzi butunze hafi 70% by’abaturage, gukoresha neza ibyanya byuhirwa bishobora kongera umusaruro, kurwanya imihindagurikire y’ibihe no gutuma abahinzi bunguka byinshi kurushaho. Muri gahunda ya guverinoma y’imyaka 5 yatangajwe ku munsi w’ejo na Minisitiri w’Intebe Dr Nsengiyumva Justin, biteganijwe ko ubuso bwuhirwa buzava kuri hegitari 71.000 bugere kuri hegitari zisaga 130.000 kugeza mu mwaka wa 2029

Mu rwego rw’ubukungu, Guverinoma igamije kuvugurura no kunoza ibikorwa by’ubuhinzi n’ubworozi hagamijwe kongera umusaruro no guha agaciro ibikorerwa mu gihugu.

Guverinoma yiyemeje kongera umusaruro ku bihingwa ngandurarugo byatoranyijwe ku kigero cya 50%, birimo ibigori, ibishyimbo, ibirayi, umuceri, imyumbati, soya, ingano, ibitoki, imboga n’imbuto.

Yiyemeje kandi gukoresha neza ifumbire n’imbuto z’indobanure, ku buryo ikoreshwa ry’ifumbire rizava ku mpuzandengo y’ibiro 70 kuri hegitari rikagera hafi ku biro 95, hashingiwe ku miterere y’ubutaka ndetse no kureshya ishoramari mu buhinzi hagamijwe guhanga udushya no guteza imbere ubuhinzi bugezweho.

Minisitiri w’Intebe yagize ati: “Kongera umusaruro bizagerwaho binyuze mu kongera ikoreshwa ry’ifumbire n’imbuto z’indobanure, tuzashyira imbaraga mu kongera ingano yabyo ndetse no kubigeza ku bahinzi ku gihe”.

Guverinoma izibanda ku kongera umusaruro w’ibihingwa byoherezwa mu mahanga nk’ikawa, icyayi, ibireti, indabo, imboga n’imbuto. Hazashyirwa kandi imbaraga mu gusazura ibiti by’ikawa bishaje, kugeza ingemwe nshya ku bahinzi, no kongera ubuziranenge bw’umusaruro kugira ngo uhangane ku isoko mpuzamahanga.

Izihatira kandi gushyiraho ibyanya byihariye bikorerwaho ubuhinzi bwa kijyambere, kunoza imikoreshereze y’ubutaka buhujwe hagamijwe kongera umusaruro no kuwongerera agaciro, kongera ubuso bwuhirwa bukava kuri hegitari 71.000 bugera kuri hegitari zisaga 130.000.

Muri iyi myaka 5 umusaruro wangirika nyuma y’isarura uzagera munsi ya 5% uvuye kuri 13,8% wariho muri 2023, binyuze mu kubaka ubwanikiro, ubuhunikiro no kongera ubushobozi bw’inganda zitunganya umusaruro.

Ati: “mu rwego rwo kugabanya umusaruro wangirika nyuma y’isarura hazanozwa imicungire y’umusaruro ku buryo umusaruro wangirika uzagera munsi ya 5% uvuye kuri 13,8% muri 2023. Bizasaba kongera ibikorwa remezo harimo ubwanikiro n’ubuhunikiro no gushyiraho imbaraga mu buryo bwo kugeza umusaruro ku masoko no kongera ubushobozi bw’inganda ziwutunganya”

Hazakoreshwa uburyo butandukanye bwo kuhira kandi hakongerwa amaterasi y’indinganire akava kuri hegitari 142,000 akagera kuri hegitari 167.000 ndetse hakubakwa amaterasi yikora mu bice byinshi by’igihugu.

Minisitiri w’Intebe Dr Nsengiyumva Justin yashimangiye ko izi gahunda zizashyirwa mu bikorwa ku bufatanye bwa Guverinoma, abikorera, inzego z’ubushakashatsi n’abaturage, kugira ngo ubuhinzi n’ubworozi bibe urufunguzo rw’iterambere ry’igihugu mu myaka itanu iri imbere.

Dr Nsegiyumva Justin yashyizwe ku mwanya wa Minisitiri w’Intebe taliki 23 Nyakanga 2025, arahirira izi nshingano taliki 25 Nyakanga 2025 akaba yarasimbuye Dr Edouard Ngirente wari umaze imyaka 8 muri izi nshingano.

TUYISHIME Egide, ni umwe mu rubyiruko ruri muri uru rugendo, atunganya urusenda akafunga neza ku buryo arwohereza ku masoko yo mu Rwanda no hanze yarwo kandi iyi ari inzira yahisemo atekereza ko izamuhindurira ubuzima kandi uko yabitekerezaga ariko byagenze.

Ati: “Nabonye ko gutunganya umusaruro ari inzira yo guhindura ibyo twahingaga bikaba ibicuruzwa byinjiriza amafaranga. Byatumye ntangira kubaho neza, kandi sinshobora kwicwa n’inzara. Ubu dufite amasoko menshi kandi natwe ubwacu tudashobora guhaza ariko turacyakomeje urugendo kandi tuzagera kuri byinshi”

TUYISHIME Egide, ni mu rubyiruko 

MUKAGAHIMA Ange we afite umushinga wo gutunganya inzuzi akazikoramo amavuta n’ibindi biribwa

Ati: “Inzuzi abantu bazifata nk’izidafite umumaro ariko njye natangiye kuzibyaza umusaruro nkazikuramo amavuta yo kurya, izindi ndazikaranga nkazishyiramo akunyu abantu bakazirya ndetse tunazikoramo ifu ikoreshwa nk’izindi fu zose ziterwa mu ngo kandi abakiriya baraboneka ntakibazo.”

RWIRIRIZA Jean Marie Vianney, Umuyobozi Mukuru w’Ihuriro ry'urubyiruko rw'u Rwanda rukora ubuhinzi n'bworozi, RYAF, avuga ko bafasha urubyiruko mu buryo burambye binyuze mu mahugurwa bahabwa ndetse n’ubundi bushobozi k’ubufatanye n’inzego zitandukanye

Ati: “Tubafasha mu buryo butandukanye burimo mahugurwa cyane cyane kubyo bakora kugirango bigire ubuziranenge kandi tukabahuza n’amahirwe, ndetse n’abatarabona ubushobozi tubakorera ubuvugizi kugira ngo babone inguzanyo cyangwa ibikoresho binyuze ku bufatanye n’izindi nzego kuko ahanini usanga igishoro ariyo mbogamizi ikomeye urubyiruko rwacu rukunze guhura nayo.”

RWIRIRIZA Jean Marie Vianney, Umuyobozi Mukuru wa RYAF

Nkuko bigaragazwa n’imibare ya raporo ya Minisiteri y’ubuhinzi n’Ubworozi yo mu mwaka wa 2024, RYAF ifite abanyamuryango barenga 12,000 mu gihugu hose bafite imishinga irenga 1,300 igabanije mu byiciro bitandukanye birimo ubuhinzi, ubworozi, kongerera agaciro umusaruro, serivisi z’ibikoresho, n’ikoranabuhanga mu buhinzi.

Ubu, mu Rwanda urubyiruko rufite ibikorwa byo kongerera agaciro umusaruro w’ubuhinzi rugera kuri 6.8% gusa.

Raporo y’umuryango mpuzamahanga ugamije kurwanya inzara no gukura abaturage mu bukene binyuze cyane cyane mu buhinzi n’ubworozi (Heifer International) yo mu mwaka wa 2021 yari yerekanye ko 70% by’urubyiruko mu Rwanda rudafite ubutaka kandi ikoranabuhanga mu buhinzi rikoreshwa na 18% gusa mu buhinzi.

Jean Bosco Nshimiyimana, umuhinzi wo mu Karere ka Gasabo wapimishije ubutaka bwe, avuga ko iyi gahunda yamuhinduriye imyumvire ku buhinzi.

Ati: “Twamenyereye kujya ku isoko tukagura ifumbire uko tubonye, rimwe na rimwe tugatera ubutaka bukanga. None ubu RAB yamfashije gupima ubutaka bwanjye, bampa ishwagara n’ifumbire bimbereye, umusaruro w’ibigori wariyongereye bitangaje”

Undi muhinzi, Jean Kelvin Ishimwe wo mu Karere ka Musanze, agira ati: “Mbere nahingaga mbwirwa ko ubutaka bwanjye butera, ariko sinabikoragaho. Nyuma yo gupimisha nahawe inama yo guhinga ibirayi n’imboga, kandi koko imbuto n’ifumbire bampa byatumye tweza inshuro zirenga ebyiri ibyo twahingaga mbere.”

Umuyobozi Mukuru wungirije ushinzwe Ubuhinzi muri RAB, Dr Florence Uwamahoro, avuga ko iyi gahunda igamije gufasha igihugu kugera ku buhinzi bushingiye ku bumenyi.

Ati: “Kugeza ubu hamaze gufatwa ibipimo birenga 6,900 by’ubutaka mu gihugu hose, kandi ubushakashatsi burakomeje kugira ngo tumenye imiterere y’ubutaka buri hose mu Rwanda”

Dr Uwamahoro akomeza asaba abahinzi bafite ubutaka bunini cyangwa gahunda zihariye kwegera RAB kugira ngo bafashwe gupima ubutaka bwabo. Ati:

“Hari ubwo umuhinzi atekereza guhinga igihingwa kitajyanye n’ubutaka afite, kandi bituma adahinga neza. Uwifuza gukora neza aho ari hose, turamwakira tukamusobanurira uburyo n’inzira yanyuramo agapimisha ubutaka n’umumaro wabyo.”

Dr UWAMAHORO Florence, Umuyobozi mukuru wungirije ushinzwe ubuhinzi muri RAB

Imibare y’Ikigo cy’Igihugu cy’Ibarurishamibare mu Rwanda (NISR) y’umwaka wa 2024 igaragaza ko u Rwanda rufite hegitari miliyoni 2.376 zihingwaho, muri zo hegitari miliyoni 1.350 bingana na 57% by’ubuso bw’igihugu zikoreshwa mu buhinzi. Muri izi, hegitari ibihumbi 987 ni iz’ibihingwa by’igihe gito, ibihumbi 513 ni iz’ibihingwa by’igihe kirekire, naho hegitari 116,000 zikoreshwa mubwubatsi.

Byatangajwe na Minisitiri w’Intebe, Dr EdouardNgirente ubwo yagezaga ku Nteko IshingaAmategeko, imitwe yombi, ikiganiro kubyakozwe na Guverinoma mu guteza imbereimibereho y’Abanyarwanda.

Ni ikiganiro cyibanze ku byakozwe mu guhindura imibereho y’Abanyarwanda binyuzemu nzego zirimo ubuhinzi, ibikorwaremezo, ubuzima n'uburezi.

Mu rwego rw’ubuhinzi, Minisitiri w’Intebe DrEdouard Ngirente yavuze ko umusarurow’ibyoherezwa mu mahanga wakomejekwiyongera hagati ya 2017-2024.

Ati “Agaciro k’umusaruro w’ibyoherezwa mu mahanga kavuye kuri miliyoni 515$ bigera kurimiliyoni 739$.”

Umubare w’ingo zari zihagije mu biribwa zari80% mu 2017 mu gihe cya COVID-19 zagezekuri 79,4%, ziba 83% mu 2024.

Minisitiri w’Intebe, Dr Ngirente Edouard, yavuze ko n’izisigaye Leta ikomeza gushyiraimbaraga mu kuzifasha.

Ati “N’iyo 17% itihagije turacyakeneyekuyifasha. Dukeneye ko buri Munyarwandawese aba yihagije mu biribwa.”

Imibare iheruka y’Ikigo cy’Igihugucy’Ibarurishamibare, NISR, yagaragaje ko mu 2024, urwego rw’ubuhinzi ruza ku mwanya waGatatu mu kugira uruhare runini mu musarurombumbe w’Igihugu, aho rwihariye 25%.