Umuyobozi wa Rwanda FDA Yatawe muri Yombi.
Urwego rw’igihugu rw’ubugenzacyaha (RIB), rwatangaje ko umuyobozi mukuru w’ikigo cy’igihugu gishinzwe ubuziranenge bw’imiti n’ibiribwa (Rwanda FDA) Emile Bienvenu hamwe n’abandi bayobozi 17, batawe muri yombi bakurikiranweho ibyaha bifitanye isano n’ikorwa n’ikwirakwizwa ry’inzoga zitujuje ubuziranenge.
Icumi mu bayobozi 18 batawe muri yombi, bakoreraga Rwanda FDA, naho umunani basigaye, harimo abayoboraga amwe mu mashami y’ikigo cy’igihugu gitsura ubuziranenge (RSB) ndetse n’abanyamabanga nshingwabikorwa b’imirenge n’utugari.
Abatawe muri yombi bose, beretswe itangazamakuru ku cyicaro gikuru cy’urwego rw’igihugu rw’ubugenzacyaha (RIB) giherereye i Kimihurura mu mujyi wa Kigali kuri uyu wa Kane tariki 13 Kanama 2026.
Mu kiganiro yahaye abanyamakuru kuri uyu wa kane, umuvugizi w’urwego rw’igihugu rw’ubugenzacyaha (RIB) Dr. Murangira B. Thierry, yavuze ko kuva tariki 20 Nyakanga 2026, dosiye 97 zifitanye isano n’ibyaha byo gukora no gukwirakwiza inzoga zitujuje ubuziranenge zamaze gushyikirizwa ubushinjacyaha. Yanaboneyeho kugaragaza ko bamwe mu bayobozi batawe muri yombi, bakurikiranweho gukoresha nabi umwanya igihugu cyabahaye, naho abandi bakaba bakurikiranweho korohereza inganda zikora ibinyobwa bisembuye gukora, nyamara zitujuje ibyangombwa bisabwa.
Yagize ati, “Bamwe muri aba bayobozi, bakoresheje nabi ububasha igihugu cyabahaye, babukoresha mu nyungu zabo bwite.”
Dr. Murangira B. Thierry, yanashimangiye ko abayobozi bakurikiranweho gukoresha ububasha bahawe mu nyungu zabo bwite, bashobora guhabwa igihano cy’igifungo kiri hagati y’imyaka 7 na 10, cyangwa se ihazabu y’Amafaranga y’u Rwanda ari hagati ya Miliyoni 5 na Miliyoni 10, mu gihe baba babihamijwe n’urukiko.
Umuvugizi wa RIB kandi, yavuze ko mu bayobozi bakurikiranwe, harimo abayobozi bari bashinzwe kugenzura iyubahirizwa ry’ibipimo ngenderwaho mu buziranenge, naho bamwe mu bayobozi b’inzego z’ibanze bakurikiranwe, bakaba bakekwaho guha mu buryo bunyuranyije n’amategekoibyangombwa byo gukora inganda zakoraga ibinyobwa bitujuje ubuziranenge.
Iperereza rya RIB kandi, ryanasanze hari inganda zakoraga zitubahirije ibisabwa mu mabwiriza y’Imikorere Myiza mu Gukora Ibicuruzwa (GPA)
Dr. Murangira B. Thierry yagize ati, “Hari inganda zakoresheje ibirango byatumaga zigaragara nk’izemewe n’amategeko, ariko mu by’ukuri ibicuruzwa byazo byakorerwaga ahantu hadafite isuku.”
Yongeyeho ko abagenzacyaha basanze hari n’ibitagenda neza mu iyandikwa ry’ibicuruzwa. Harimo aho inganda zandikishaga ibicuruzwa bimwe, ariko nyuma zikaza gukora n’ibindi bicuruzwa bitari byaranditswe.
