Bruno Ferry yagizwe umutoza mukuru wa Rayon Sports
Umufaransa Bruno Ferry yagizwe umutoza mukuru wa Rayon Sports asimbuye Umunya-Tunisia, Afhamia Lotfi wirukanywe kubera umusaruro mubi.
Iyi kipe yabitangaje ku mugoroba wo kuri uyu wa Gatatu, tariki ya 17 Ukuboza 2025, ibinyujije ku mbuga nkoranyambaga zayo.
Uyu mugabo w’imyaka 58, ategerejwe i Kigali kuri wa Gatanu, aho azungirizwa na Lomami Marcel na Haruna Ferouz.
Rayon Sports nta mutoza mukuru yari ifite kuva mu Gushyingo 2025, nyuma yaho
Afhamia Lotfi wirukanywe kubera Umusaruro mubi.
Bruno Ferry afite impamyabushobozi yo gutoza ya A UEFA Pro, akaba yaratoje mu makipe atandukanye yo muri Afurika arimo AS Vita Club yo muri Repubulika Iharanira Demokarasi ya Congo, Azam FC yo muri Tanzania na Accra Lions yo muri Ghana.
Rayon Sports ntiyagize intagiriro nziza muri uyu mwaka w’imikino, kuri ubu iri ku mwanya wa Gatandatu n’amanota 17 muri Shampiyona, irushwa amanota icyenda na Police FC iri ku mwanya wa mbere.
Iyi kipe yatangiye gushaka abakinnyi izongeramo muri Mutarama 2026 bakayifasha kwitwara neza barimo
Umunya-Uganda, Muhamed Kagawa Ssenoga, wakiniraga Express FC y’iwabo.
Iyi kipe izasubira mu kibuga ku wa Gatanu, tariki ya 19 Ukuboza 2025, yakirwa na Gorilla FC mu mukino w’umunsi wa 12 wa Shampiyona.
