U Rwanda ruritegura kwakira inama ya gatandatu ku mikoreshereze y’ingufu zisubira (Renewable Energy Summit)
Mu rwego rwo gukomeza guteza imbere ikoreshwa ry’ingufu zisukuye no guhangana n’ingaruka z’imihindagurikire y’ibihe, u Rwanda ruritegura kwakira ku nshuro ya gatandatu inama mpuzamahanga yiga ku mikoreshereze y’ingufu zisubira izwi nka Renewable Energy Summit. Biteganyijwe ko iyi nama izabera i Kigali kuva ku wa 8 kugeza ku wa 10 Nzeri 2026, ikazahuza abayobozi ba za guverinoma, abashoramari, impuguke mu rwego rw’ingufu, abafatanyabikorwa mu iterambere ndetse n’abikorera baturutse mu bihugu bitandukanye.
Iyi nama izibanda ku gushaka ibisubizo birambye byafasha Afurika kwihutisha ikoreshwa ry’ingufu zisukuye kandi zihendutse, hagamijwe guteza imbere ubukungu, kongera amahirwe y’ishoramari no gufasha abaturage kubona amashanyarazi mu buryo bwizewe. Abazayitabira bazungurana ibitekerezo ku ikoranabuhanga rigezweho, uburyo bwo kongera ishoramari mu rwego rw’ingufu zisubira ndetse n’ingamba zakwihutisha iterambere ry’uru rwego ku mugabane wa Afurika.
Biteganyijwe kandi ko iyi nama izaba irimo ibiganiro mpaka, imurikabikorwa ry’ikoranabuhanga rigezweho mu rwego rw’ingufu zisubira, ndetse n’urugendo rugamije gusura imwe mu mishinga y’icyitegererezo y’ingufu zisukuye iri mu Rwanda. Ibi bizaha abayitabiriye amahirwe yo kungurana ubunararibonye no kurebera hamwe ibisubizo bishya byafasha ibihugu bitandukanye kugera ku iterambere rirambye.
Abategura iyi nama bavuga ko u Rwanda rukomeje kwigaragaza nk’igihugu cyiyemeje guteza imbere ingufu zisukuye no kurengera ibidukikije binyuze mu ishyirwa mu bikorwa rya gahunda zitandukanye zigamije kongera ingufu zituruka ku mirasire y’izuba, amazi n’andi masoko atangiza ibidukikije. Kwakira iyi nama bikaba ari amahirwe yo gukomeza gukurura ishoramari no gushimangira uruhare rw’u Rwanda mu rugendo rwo guteza imbere ingufu zisubira muri Afurika.
Iyi nama izategurwa ku bufatanye bw’Ikigo Energy Private Developers (EPD) na Minisiteri y’Ibikorwaremezo (MININFRA), hamwe n’abafatanyabikorwa batandukanye. Byitezwe ko izatanga umusanzu mu gushyiraho ubufatanye bushya, gushora imari mu mishinga y’ingufu zisukuye no gufasha Afurika kugera ku ntego z’iterambere rirambye binyuze mu gukoresha ingufu zita ku bidukikije.
