Umunyarwandakazi yegukanye umudali wa Bronze mu irushanwa ryo gusiganwa ku maguru ku Isi
Umunyarwandakazi Florence Niyonkuru yegukanye umudali wa Bronze mu irushanwa ryo gusiganwa ku maguru ku Isi, mu cyiciro cya Half Marathon, ryabereye i Copenhagen muri Denmark ku Cyumweru tariki 20 Nzeri 2026.
Niyonkuru yasoje isiganwa rya kilometero 21.1 mu isaha imwe, iminota itandatu n’amasegonda umunani, ashyiraho agahigo gashya k’u Rwanda muri Half Marathon. Yasoje ku mwanya wa gatatu, inyuma y’Umunyakenyakazi Agnes Ngetich wegukanye Zahabu na mugenzi we Veronica Loleo wegukanye Silver.
Uyu mudali wongeye ku mateka meza Niyonkuru ari gukora muri uyu mwaka, nyuma yo kwegukana Bronze mu mikino ya Commonwealth Games yabereye i Glasgow. Uwo mudali wari uw’amateka kuko yabaye Umunyarwandakazi wa mbere wegukanye umudali muri iyo mikino.
Niyonkuru w’imyaka 25 ahagarariye Sina Gérard Athletics Team kandi amaze kwigaragaza mu gusiganwa intera ndende. Yatangiye kurushaho kumenyekana nyuma yo kwegukana Zahabu muri Half Marathon ya Kigali International Peace Marathon mu 2025.
Muri uyu mwaka, Niyonkuru kandi yegukanye Zahabu mu gusiganwa metero 10,000 muri TCS World 10K Bengaluru, ndetse akomeza kugaragaza ubushobozi bwe mu marushanwa mpuzamahanga.
Muri iri rushanwa ry’i Copenhagen, Niyonkuru yari mu bakinnyi bakurikiraga hafi abakinnyi b’imbere mu ntangiriro z’isiganwa, mbere y’uko Ngetich atangira gusiga abandi. Ngetich yegukanye Zahabu mu gihe cy’isaha imwe, iminota itanu n’amasegonda 15, mu gihe Loleo yatwaye Silver.
Umudali wa Bronze wa Niyonkuru ukomeje kongera umubare w’imidali mpuzamahanga u Rwanda rwegukana mu gusiganwa intera ndende, ndetse ukaba ushimangira umwaka mwiza uyu mukinnyi ari kugira.
