Umusaruro Mbumbe w’u Rwanda wazamutseho 11.8% mu gihembwe cya 3 cya 2025

Umusaruro mbumbe w’u Rwanda wari kuri 7.8% mu gihembwe cya kabiri cya 2025 mu gihe kandi wari kuri 6.5% mu gihembwe cya mbere cya 2025.

Ikigo cy’Igihugu cy’Ibarurishamibare, NISR, cyavuze ko iri zamuka ryagizwemo uruhare n’urwego rwa serivisi rwageze kuri 57%, ubuhinzi bugira 15%, inganda 22% ndetse n’umusaruro wavuye mu misoro ubarirwa kuri 6%.

Urwego rw’ubuhinzi rwazamutseho 10%, inganda zizamukaho 17% mu gihe urwego rwa serivisi rwazamutseho 10%.

Urwego rw’ubuhinzi muri rusange rwazamutseho 10% bugira uruhare rwa 1.5% ku musaruro mbumbe wose w’igihugu.

Mu rwego rw’ubuhinzi, umusaruro w’ibihingwa ngandurarugo wiyongereyeho 4%, mu gihe umusaruro w’ibihingwa ngengabukungu wiyongereyeho 35%, ubworozi bwiyongeraho 6%, naho uburobyi bwiyongereyeho 34%.

Iterambere rusange ry’inganda ryageze kuri 17% rigira uruhare rungana na 3.7% ku iterambere rusange ry’umusaruro mbumbe w’igihugu (GDP).

Mu rwego rw’inganda kandi ubucukuzi bw’amabuye y’agaciro bwiyongereyeho 14%, ibikorwa by’ubwubatsi byiyongeraho 20%, mu gihe inganda zitunganya ibicuruzwa (manufacturing) zongereye umusaruro ku kigero cya 14%.

Iterambere ry’inganda zitunganya ibicuruzwa ryatewe ahanini n’izamuka ry’umusaruro w’ibikomoka ku bikoresho nka sima, wazamutseho 44%.

Umusaruro w’ibikomoka ku byuma wazamutseho 28%, naho umusaruro w’imiti wazamutseho 25%. Gutunganya ibiribwa byiyongereyeho 12%.

Iterambere rusange ry’urwego rwa serivisi ryageze kuri 10% kandi ryagize uruhare rwa 5.5% ku musaruro mbumbe w’Igihugu (GDP).

Mu rwego rwa serivisi, ubucuruzi bunini n’ubuciriritse bwiyongereyeho 20%, mu gihe serivisi z’ubwikorezi ziyongereyeho 9%.

Izindi serivisi zijyanye n’itumanaho ndetse n’ikoranabuhanga ziyongereyeho 17%, iz’imari ziyongeraho 10% mu gihe serivisi z’amahoteli n’amaresitora zagabanyutseho 3%.

Serivisi z’ubuyobozi bwa Leta ziyongereyeho 7%, serivisi z’uburezi ziyongeraho 5%, naho serivisi z’ubuzima zigabanyukaho 16%.