Ikipe ya Arsenal yegukanye igikombe gitangiza umwaka w’imikino mu Bwongereza.
Kuri iki Cyumweru tariki 16 Kanama 2026, ikipe ya Arsenal yegukanye igikombe kitwa FA Community Shield gihuza ikipe yatwaye Shampiyona y’icyiciro cya mbere mu mupira w’amaguru mu Bwongereza (English Premier League) ndetse n’ikipe yatwaye igikombe cya FA Cup, itsinze Manchester City ibitego 3-0, mu mukino wabereye ku kibuga cyitwa Principality Stadium giherereye mu mujyi wa Cardiff, ari na wo murwa mukuru w’igihugu cya Wales kibarizwa mu bwami bw’Ubwongereza.
Ibyo bitego, byatsinzwe na Riccardo Calafiori ku isegonda rya 23 ry’umukino, ku mupira yahawe neza na Lewis-Skelly, Kai Havertz ku munota wa 28 w’umukino, ku mupira yahawe n’umukinnyi wa Arsenal mushya witwa Christos Tzolis, ndetse na Kapiteni wa Arsenal Martin Odegaard, iminota 3 gusa nyuma y’itangira ry’igice ya kabiri cy’umukino, ku mupira yahawe na none na Christos Tzolis.
Uyu mukino, ni wo wa mbere umutoza mushya wa Manchester City Enzo Maresca atakaje kuva yatangira gutoza iyi kipe asimbuye Pep Guardiola.
Ikipe ya Arsenal, yatsinze ikipe ya Manchester City mu nshuro zose aya makipe yombi yahuriye mu mukino wo guhatanira igikombe cya FA Community Shield.
Inshuro ya mbere, aya makipe yombi yahuye mu mwaka wa 1934, maze Arsenal itwara iki gikombe inyagiye ikipe ya Manchester City ibitego 4-0. Aya makipe yombi, yongeye guhurira muri iki gikombe mu mwaka wa 2014, aho Arsenal yatsinze Manchester City ibitego 3-0, yongera kandi guhurira muri uyu mukino mu mwaka wa 2023, aho ikipe ya Arsenal yatsinze Manchester City Penariti 4-1, nyuma y’uko umukino urangiye amakipe yombi anganya igitego 1-1, none amateka yongeye kwisubiramo muri 2026, aho Arsenal itsinze Manchester City ibitego 3-0.
Nyuma y’uko Arsenal itwaye igikombe cya FA Community Shield, abakunzi b’umupira w’amaguru, by’umwihariko abakurikira Shampiyona y’Ubwongereza, bateze amaso kureba niba iyi kipe izongera ikisubiza igikombe yatwaye mu mwaka w’imikino ushize wa 2025-2026, aho yagitwaye imaze imyaka 22 itagiheruka.
Shampiyona y’icyiciro cya mbere mu mupira w’amaguru mu Bwongereza, izatangira kuwa 21 Kanama 2026, aho saa tatu z’ijoro ku masaha yo mu Rwanda, ikipe ya Arsenal izatangira ikina na Coventry City yazamutse uyu mwaka, naho Manchester City yo, izaseruka kuwa 23 Kanama 2026, yakira ikipe ya AFC Bournemouth saa cyenda z’igicamunsi ku masaha yo mu Rwanda.
Si ibyo gusa, kuko n’amakipe akundwa n’abantu benshi na yo azaseruka. Ikipe ya Manchester United izatangira yakirwa n’ikipe ya Hull City yazamutse uyu mwaka, uwo mukino ukaba uzaba tariki 21 Kanama 2026 saa saba n’igice z’amanywa. Ikipe ya Liverpool yo izaseruka kuwa 23 Kanama isura ikipe ya Newcastle United saa kumi n’imwe n’igice z’umugoroba. Ikipe ya Chelsea, ni yo izasoza umunsi wa mbere w’iyi shampiyona, aho izaba yasuye ikipe ya Fullham, uwo mukino ukaba uzaba kuwa 24 Kanama 2026 saa tatu z’ijoro.
