Manchester United Yirukanye Umutoza Wayo Atayimazemo Umwaka.
Ikipe ya Manchester United, yirukanye uwari umutoza mukuru wayo Michael Carrick, nyuma y’ibihe by’umusaruro mubi iyi kipe yari irimo, bigatuma igera ku mwanya wa 18 ku rutonde rw’agateganyo rwa Shampiyona y’u Bwongereza (Premier League), aho mu mikino icumi iyi kipe imaze gukina, imaze kuyisaruramo amanota umunani gusa.
Amakuru yo gutandukana kwa Manchester United n’uyu mutoza w’imyaka 45 y’amavuko, yamenyekanye kuri uyu wa Kane tariki 12 Ugushyingo 2026, nyuma y’inama yahuje abayobozi bakuru b’iyi kipe yabereye i Monaco ku wa Gatatu w’iki cyumweru.
Muri iyo nama, harimo Umuyobozi Mukuru wa Manchester United Omar Berrada, Umuyobozi ushinzwe ibikorwa by’umupira w’amaguru Jason Wilcox, ndetse na Sir Jim Ratcliffe, umwe mu banyamigabane bafite ijambo rinini muri iyi kipe.
Iki cyemezo, cyafashwe nyuma y’uko Manchester United inganyije na Aston Villa ibitego 4-4 ku Cyumweru tariki ya 8 Ugushyingo 2026, bikayisiga iri ku mwanya wa 18 muri Premier League.
Iyi kipe, imaze gutsinda umukino umwe gusa mu mikino 10 ya mbere ya shampiyona y’uyu mwaka, bikaba ari intangiriro mbi iyi kipe igize mu myaka 40 ishize.
Carrick, yari amaze igihe ashyirwaho igitutu n’abafana ndetse n’abayobozi b’iyi kipe, aho yasabwe kenshi kwikubita agashyi agatanga umusaruro mwiza, ariko icyo gitutu kiza kwiyongera cyane, nyuma y’uko Manchester United itsindiwe mu rugo na Bournemouth ibitego 3-0 ku wa 25 Ukwakira 2026.
Icyo gihe, ubuyobozi bw’ikipe bwari bwafashe icyemezo cyo gukomeza kumugirira icyizere, bukamuha amahirwe yo kwitwara neza, mbere y’uko habaho ikiruhuko cy’imikino y’amakipe y’ibihugu muri uku kwezi kw’Ugushyingo.
Gusa, nta cyahindutse ku buryo ikipe yitwaraga nk’uko byari byitezwe, bituma ubuyobozi bufata icyemezo cyo gutandukana na we.
Carrick, yari yagizwe umutoza w’agateganyo muri Mutarama 2026, asimbuye Ruben Amorim, mbere yo guhabwa amasezerano y’imyaka ibiri muri Gicurasi, aho ayo masezerano yagombaga kumugeza mu mwaka wa 2028.
Mu mikino 16 yayoboye mu gice cya kabiri cya shampiyona yari yabanje, Carrick yatsinzemo 11, afasha Manchester United kurangiza ku mwanya wa gatatu no kubona itike yo gukina UEFA Champions League.
Ariko intangiriro mbi y’iyi kipe muri shampiyona ya 2026/2027 yagabanyije icyizere ubuyobozi bwari bwaramugiriye.
Mu marushanwa yose y’uyu mwaka w’imikino wa 2026/2027, Michael Carrick yari amaze gutoza ikipe ya Manchester United imikino 15. Muri iyo mikino, yatsinzemo itatu gusa, anganya itanu, atsindwa irindwi, mu gihe kuva yagera muri iyi kipe muri Mutarama 2026 kugeza ubwo yirukanwaga, yari amaze gutoza iyi kipe imikino 31. Muri iyo mikino, yatsinzemo imikino cumi n’ine, anganya imikino umunani, atsindwa imikino icyenda.
Mauricio Pochettino ari mu bahabwa amahirwe yo gusimbura Carrick.
Umutoza ukomoka muri Argentina Mauricio Pochettinousanzwe atoza ikipe y’igihugu ya Leta Zunze Ubumwe za Amerika, ari mu bahabwa amahirwe menshi yo gusimbura Michael Carrick.
Amakuru atangazwa n’ibitangazamakuru bitandukanye, yerekana ko Manchester United yamaze kugirana ibiganiro n’uyu mutoza w’imyaka 54 y’amavuko, ndetse impande zombi zikaba zarumvikanye ku bijyanye n’uko ashobora guhabwa aka kazi.
Pochettino yigeze gutoza amakipe arimo Tottenham Hotspur, Chelsea na Paris Saint-Germain.
Bivugwa ko amasezerano afitanye n’ikipe y’igihugu ya Leta Zunze Ubumwe za Amerika arimo ingingo imwemerera kuyivamo mu gihe hishyuwe Miliyoni icumi z’amadolari, ni ukuvuga miliyoni zirindwi z’amapawundi (£7m) zo kumurekura.
Manchester United, biteganyijwe ko igomba gusubira mu kibuga ikina Shampiyona y’u Bwongereza (Premier League) ihura na Liverpool, uwo mukino ukazabera ku kibuga cya Liverpool cya Anfield ku wa 22 Ugushyingo 2026.
