Inama y’Abaminisitiri Yashyizeho Abayobozi Bashya mu Nzego Zinyuranye.
Inama y’Abaminisitiri yateranye kuwa 18 Nzeri 2026 muri Village Urugwiro iyobowe na Nyakubahwa Perezida wa Repubulika Paul Kagame, yashyizeho abayobozi bashya mu nzego zitandukanye zirimo Sena, Minisiteri y’Ubutabera, Minisiteri y’Ubutegetsi bw’Igihugu, Ikigo cy’Igihugu Gishinzwe Kugenzura Imiti n’Ibiribwa (Rwanda FDA), Komisiyo y’u Rwanda ishinzwe Ivugururwa ry’Amategeko (RLRC) ndetse n’Urwego rw’Igihugu rw’Igororamuco
Inama y’Abaminisitiri, yagize Prof Muganga Raymond umuyobozi mushya w’ikigo cy’igihugu gishinzwe imiti n’ibiribwa (Rwanda FDA), akaba asimbuye Emile Bienvenu uri gukurikiranwa n’inzego z’ubutabera ku bwo gukekwaho uruhare mu koroshya ikorwa n’icuruzwa ry’inzoga zitujuje ubuziranenge.
Mbere yo guhabwa uyu mwanya, Prof Muganga Raymond, yari umuyobozi w’ishami rya serivisi za Laboratwari muri Rwanda FDA kuva mu mwaka wa 2024.
Uretse Prof Muganga Raymond wagizwe umuyobozi mushya wa Rwanda FDA, hari n’abandi bayobozi bazakorana na we bashyizweho n’inama y’abaminisitiri. Abo ni Pierre Munyampundu wagizwe umuyobozi ushinzwe ishami ry’ibiribwa, ndetse na Monia Kabandana wagizwe umuyobozi mukuru w’ishami rya serivisi za Laboratwari.
Muri Minisiteri y’Ubutabera, hongerewemo amaraso mashya, kuko yabonye umunyamabanga uhoraho mushya. Uwo ni Madame Bibiane Umuzayire Burayobera wasimbuye Théophile Mbonera wari kuri uyu mwanya kuva mu mwaka wa 2020.
Mbere yo guhabwa uyu mwanya, Madame Bibiane Umuzayire Burayobera yari umuyobozi wungirije wa Komisiyo y’u Rwanda ishinzwe Ivugururwa ry’Amategeko (RLRC).
Muri Komisiyo y’u Rwanda ishinzwe Ivugururwa ry’Amategeko (RLRC) na ho hakozwe impinduka, aho Izere Parfait yagizwe umuyobozi wungirije, naho Marie Jeanne Munezero na Samuel Ngirinshuti bo bagirwa ba Komiseri.
Abandi bayobozi bahawe inshingano nshya n’inama y’Abaminisitiri, ni Olivier Mushimire wagizwe umunyamabanga mukuru muri Sena, Jean Pierre Rwagasana wagizwe umuyobozi ushinzwe imirimo rusange muri Minisiteri y’Ubutabera, Ingabire Chadia wagizwe umuyobozi ushinzwe imirimo rusange muri Minisiteri y’Ubutegetsi bw’Igihugu, ndetse na Charles Munyaneza wagizwe umuyobozi w’urwego rw’igihugu rw’igororamuco.
