Koreya y’Epfo yibasiwe n’imyuzure ikomeye
Imvura nyinshi imaze iminsi igwa mu bice bitandukanye bya Koreya y’Epfo yateje imyuzure n’inkangu, ndetse ibangamira ubuzima bw’abaturage n’ingendo.
Intara ya South Gyeongsang ni imwe mu zagizweho ingaruka cyane, cyane cyane mu mujyi wa Geoje, aho haguye hafi milimetero 810 z’imvura mu minsi itatu. Mu isaha imwe gusa, haguye imvura irenga milimetero 120.
Imvura nyinshi yateje inkangu muri Geoje, ndetse inyubako n’imihanda bimwe bigerwaho n’ingaruka z’iyo mvura.
Abaturage bagera kuri 390 bamaze kwimurwa mu byabo kubera impungenge z’imyuzure n’inkangu zishobora kongera kuba. Imiryango ibihumbi na yo yahuye n’ikibazo cyo kubura amashanyarazi.
Imihanda imwe yararengewe n’amazi, bituma ingendo zigora mu bice byibasiwe. Abashinzwe ubutabazi bakomeje gufasha abaturage no gukurikirana ahashobora kongera kwibasirwa n’imyuzure cyangwa inkangu.
Abayobozi basabye abaturage batuye mu bice bishobora kwibasirwa gukurikiza amabwiriza yo kwimuka no gukomeza kwitwararika mu gihe imvura ikomeje kugwa.
